پاکستان اسلام آباد امن مذاکرات کے لیے ایران کی باضابطہ تصدیق کا منتظر ہے، وزیر اطلاعات

وفاقی وزیر اطلاعات عطا اللہ تارڑ نے منگل کے روز کہا ہے کہ اسلام آباد میں مجوزہ امن مذاکرات کے لیے ایرانی وفد کی شرکت سے متعلق پاکستان کو اب بھی تہران کی باضابطہ توثیق کا انتظار ہے، جبکہ جنگ بندی برقرار رکھنے اور مذاکراتی عمل کو آگے بڑھانے کے لیے سفارتی کوششیں جاری ہیں۔

انہوں نے کہا کہ پاکستان بطور ثالث ایرانی قیادت سے مسلسل رابطے میں ہے اور مذاکرات و سفارت کاری کے ذریعے پیش رفت کی کوشش کر رہا ہے۔ ان کے مطابق 22 اپریل کو صبح 4 بج کر 50 منٹ (پاکستان معیاری وقت) پر دو ہفتوں کی جنگ بندی ختم ہونے سے قبل ایران کا مذاکرات میں شرکت کا فیصلہ نہایت اہمیت کا حامل ہے۔

انہوں نے مزید کہا کہ پاکستان ایرانی قیادت کو مذاکرات کے دوسرے دور میں شرکت پر آمادہ کرنے کے لیے مسلسل کوششیں کر رہا ہے۔

حکام کا کہنا ہے کہ یہ سفارتی کوششیں ایسے وقت میں جاری ہیں جب واشنگٹن کی جانب سے ملے جلے اشارے سامنے آ رہے ہیں، جہاں ایک طرف مذاکرات کی بات کی جا رہی ہے تو دوسری جانب دھمکیاں بھی دی جا رہی ہیں، جس سے جنگ بندی کے برقرار رہنے اور بات چیت کے امکانات پر خدشات پیدا ہو گئے ہیں۔

دوسری جانب نائب وزیراعظم اور وزیر خارجہ سینیٹر اسحاق ڈار نے سعودی وزیر خارجہ شہزادہ فیصل بن فرحان آل سعود سے ٹیلیفون پر بات چیت کی، جس میں خطے کی تازہ صورتحال پر تبادلہ خیال کیا گیا۔

دونوں رہنماؤں نے دیرپا امن اور استحکام کے لیے مذاکرات اور رابطے کی اہمیت پر زور دیا، جبکہ سعودی وزیر خارجہ نے پاکستان کی سفارتی کوششوں کی حمایت کا اعادہ کرتے ہوئے قریبی رابطے میں رہنے پر اتفاق کیا۔