وائٹ ہاؤس نے جنگ بندی میں توسیع کی امریکی درخواست کی تردید کر دی

وائٹ ہاؤس نے ایران جنگ کے حوالے سے جنگ بندی میں توسیع کی خبروں کو مسترد کرتے ہوئے کہا ہے کہ ایسی رپورٹس درست نہیں ہیں، تاہم ایران کے ساتھ مذاکرات کا عمل جاری اور مثبت سمت میں گامزن ہے۔

وائٹ ہاؤس کی پریس سیکرٹری کیرولین لیویٹ نے بدھ کے روز پریس بریفنگ کے دوران صحافیوں کو بتایا کہ ایران کے ساتھ دوسرے مرحلے کے مذاکرات پر بات چیت جاری ہے اور یہ پیش رفت حوصلہ افزا ہے۔ انہوں نے عندیہ دیا کہ ممکنہ طور پر آئندہ مذاکرات بھی پاکستان میں ہی ہوں گے، جو اس تنازع کے خاتمے کے لیے واحد ثالث کے طور پر سامنے آیا ہے۔

کیرولین لیویٹ کے مطابق یہ بات چیت جاری اور نتیجہ خیز ہے، اور اگرچہ براہِ راست ملاقاتوں کے امکانات پر بھی غور ہو رہا ہے، لیکن کوئی بھی بات اس وقت تک حتمی نہیں جب تک وائٹ ہاؤس خود اس کی تصدیق نہ کرے۔ تاہم ہمیں معاہدے کے امکانات کے حوالے سے مثبت احساس ہے۔

یاد رہے کہ گزشتہ ہفتے ہونے والے مذاکرات کسی حتمی معاہدے کے بغیر ختم ہو گئے تھے۔ یہ جنگ ڈونلڈ ٹرمپ نے 28 فروری کو اسرائیل کے ساتھ مل کر شروع کی تھی، جس کے بعد ایران نے خلیجی ممالک پر حملے کیے اور لبنان میں اسرائیل اور ایران کی حمایت یافتہ حزب اللہ کے درمیان کشیدگی دوبارہ شدت اختیار کر گئی۔