پیچیدگیوں کے باوجود پاکستان، امریکہ ایران مذاکرات کے حوالے سے پُرامید ہے، دفترِ خارجہ

پاکستان نے امریکہ اور ایران کے درمیان جاری مذاکرات کی کوششوں پر امید کا اظہار کرتے ہوئے بیجنگ اور اسلام آباد میں پیش کیے گئے امن منصوبوں کو علاقائی استحکام کے لیے کلیدی قرار دیا ہے۔

ترجمان دفترِ خارجہ طاہر اندرابی نے ہفتہ وار بریفنگ میں بتایا کہ پاکستان جنگ کے خاتمے اور پائیدار تصفیے کے لیے سہولت کاری کا کردار ادا کر رہا ہے اور اس ضمن میں امریکہ و ایران کی جانب سے پاکستان پر اعتماد کا اظہار اطمینان بخش ہے۔

انہوں نے واضح کیا کہ پاکستان کا موقف اصولوں اور انسانی چارٹر پر مبنی ہے اور وہ کسی بھی فریق پر امریکی مطالبات تسلیم کرنے کے لیے دباؤ نہیں ڈال رہا بلکہ صرف سفارت کاری کی وکالت کر رہا ہے۔

ایک مثبت پیش رفت کے طور پر ایرانی حکومت نے پاکستانی پرچم بردار مزید 20 بحری جہازوں کو آبنائے ہرمز سے گزرنے کی اجازت دے دی ہے، جس کے تحت روزانہ دو جہاز وہاں سے گزریں گے۔ ترجمان نے ان اطلاعات کو مسترد کیا کہ ایران مذاکرات میں حصہ نہیں لے رہا، ساتھ ہی انہوں نے بھارت اور افغانستان سے پھیلائی جانے والی جھوٹی خبروں سے خبردار کرتے ہوئے انہیں انتہائی خطرناک قرار دیا۔ ان کا کہنا تھا کہ یورپی کونسل، ملائیشیا اور دیگر ممالک نے پاکستان کے امن اقدامات کی حمایت کی ہے۔

بھارتی بیانات کا جواب دیتے ہوئے ترجمان نے پاکستانی شیعہ کمیونٹی سے متعلق ریمارکس کو مسترد کیا اور کہا کہ بھارت فرقہ واریت پھیلانے کی مذموم کوشش کر رہا ہے۔ انہوں نے اعداد و شمار کے حوالے سے بتایا کہ بھارت میں ہجوم کے ہاتھوں مسلمانوں کے قتل کے سالانہ تقریباً 100 واقعات رپورٹ ہوتے ہیں، جن کے مجرم ریاستی سرپرستی میں قانون سے بچ نکلتے ہیں۔

افغانستان کے حوالے سے انہوں نے واضح کیا کہ وہاں سے ہونے والی سرحد پار دہشت گردی کا خاتمہ افغان حکومت کی ذمہ داری ہے اور اسے تحریری طور پر اس بات کی ضمانت دینا ہوگی کہ اس کی سرزمین پاکستان کے خلاف استعمال نہیں ہوگی۔ اس کے علاوہ انہوں نے بتایا کہ آپریشن غضب للحق پوری قوت سے جاری ہے اور اس حوالے سے پاکستان کی پالیسی میں کوئی تبدیلی نہیں آئی ہے۔