آسٹریلوی وزیراعظم ایران بحران پر قوم سے خطاب کرینگے

آسٹریلیا کے وزیراعظم انتھونی البانیزی بدھ کے روز مشرق وسطیٰ کی جنگ کے حوالے سے قوم سے ایک اہم خطاب کریں گے، جس میں میڈیا رپورٹس کے مطابق عوام کو ایندھن کے محتاط استعمال کی ترغیب دی جا سکتی ہے۔ یہ خطاب شام 7 بجے ملک بھر کے بڑے ٹی وی اور ریڈیو نیٹ ورکس پر بیک وقت نشر کیا جائے گا۔

اس نوعیت کے قومی خطابات ماضی میں کووڈ وبا اور 2008 کے عالمی مالیاتی بحران کے دوران بھی کیے گئے تھے۔ وزیر ہاؤسنگ کلیئر او نیل نے کہا کہ ایسے خطابات عموماً بڑے قومی چیلنجز کے وقت کیے جاتے ہیں اور وزیر اعظم عوام کو ایران سے متعلق صورتحال اور حکومتی اقدامات سے آگاہ کریں گے۔

اگرچہ وزیراعظم کے ترجمان نے خطاب کے مندرجات پر تبصرہ کرنے سے گریز کیا ہے، تاہم مشرق وسطیٰ میں جاری ایک ماہ طویل جنگ نے عالمی معیشت پر گہرے اثرات ڈالے ہیں، توانائی کی سپلائی متاثر ہوئی ہے اور ہزاروں افراد ہلاک ہو چکے ہیں۔

حکومت نے پیر کے روز اعلان کیا تھا کہ عوام کو بڑھتی ہوئی قیمتوں سے ریلیف دینے کے لیے پیٹرول اور ڈیزل پر ایکسائز ڈیوٹی کو تین ماہ کے لیے نصف کر دیا جائے گا اور ہیوی روڈ یوزر چارج بھی ختم کیا جائے گا، جس سے قومی خزانے پر تقریباً 2.55 ارب آسٹریلوی ڈالر کا بوجھ پڑے گا۔

وزیر خزانہ جم چالمرز نے کہا کہ جنگ سے متاثرہ چھوٹے کاروباروں کو آسان قرضوں کی سہولت فراہم کی جائے گی تاکہ وہ اس مشکل دور سے نمٹ سکیں۔