امریکہ نے پاکستان سمیت پانچ ممالک کو اپنی سلامتی کیلئے خطرہ قرار دیدیا

امریکہ نے پاکستان کو ان پانچ ممالک میں شامل کیا ہے جو شدید سکیورٹی خطرات پیدا کر رہے ہیں، اور امریکی انٹیلی جنس چیف نے خبردار کیا ہے کہ اسلام آباد مبینہ طور پر ایسے میزائل نظام تیار کر رہا ہے جو امریکی حدود تک پہنچنے کی صلاحیت رکھتے ہیں۔

امریکی سینیٹ کی انٹیلی جنس کمیٹی کے سامنے بیان دیتے ہوئے ڈائریکٹر آف نیشنل انٹیلی جنس تلسی گیبارڈ نے کہا کہ امریکی انٹیلی جنس کمیونٹی کے جائزے کے مطابق پاکستان، روس، چین، شمالی کوریا اور ایران مختلف میزائل ڈلیوری سسٹمز تیار کر رہے ہیں جن میں روایتی اور جوہری ہتھیار لے جانے کی صلاحیت موجود ہے۔

تلسی گیبارڈ نے قانون سازوں کو بتایا کہ یہ ممالک جدید، غیر معمولی یا روایتی میزائل نظام تیار کر رہے ہیں جو امریکی سرزمین کو ممکنہ خطرے میں ڈال سکتے ہیں۔ اس جائزے میں پاکستان پر مبینہ طور پر انٹرکانٹینینٹل بیلسٹک میزائل (آئی سی بی ایم) صلاحیتوں پر کام کرنے کا الزام بھی شامل تھا، تاہم تکنیکی تفصیلات عام نہیں کی گئیں۔

امریکی حکام نے چین اور روس کو سب سے فوری اور براہ راست چیلنج قرار دیا، کیونکہ ان کے جدید دفاعی نظام امریکی سکیورٹی کے لیے خطرہ پیدا کر سکتے ہیں۔ چین کو مصنوعی ذہانت میں بھی اہم حریف کے طور پر اجاگر کیا گیا، جس سے اسٹریٹجک مقابلہ مزید شدت اختیار کر گیا ہے۔