اے ڈی بی نے پاکستان کے لیے 2026 تا 2030 کی نئی حکمت عملی پیش کر دی

ایشین ڈیولپمنٹ بینک نے بدھ کے روز پاکستان کے لیے 2026 سے 2030 تک کی نئی کنٹری پارٹنرشپ اسٹریٹیجی متعارف کرا دی ہے، جس میں نجی شعبے کی قیادت میں ترقی کے ذریعے پائیدار اور جامع اقتصادی ترقی کی جانب ملک کے سفر میں معاونت کا روڈ میپ پیش کیا گیا ہے۔

پریس ریلیز کے مطابق پانچ سالہ حکمت عملی تین اہم راستوں پر توجہ دے گی جن میں نجی شعبے کی ترقی کو ممکن بنانا، شمولیت اور بااختیاری کو فروغ دینا، اور لچک و پائیداری کو مضبوط بنانا شامل ہیں۔

ایشین ڈیولپمنٹ بینک کے مطابق ان ترجیحات کو بہتر طرز حکمرانی اور ادارہ جاتی مضبوطی، صنفی برابری اور سماجی شمولیت، ڈیجیٹل تبدیلی، اور علاقائی تعاون و انضمام جیسے موضوعات کے ذریعے مزید تقویت دی جائے گی۔

پاکستان کے لیے ایشین ڈیولپمنٹ بینک کی کنٹری ڈائریکٹر ایما فین نے کہا کہ نئی کنٹری پارٹنرشپ اسٹریٹیجی پاکستان کو درپیش ساختی چیلنجز سے نمٹنے اور مضبوط و دیرپا اقتصادی ترقی کو فروغ دینے کے لیے تیار کی گئی ہے، تاکہ اس کے فوائد پورے ملک کو خصوصاً غریب اور کمزور طبقات کو حاصل ہوں۔

انہوں نے کہا کہ یہ حکمت عملی اہم شعبوں میں اسٹریٹجک سرمایہ کاری اور اصلاحات کو فروغ دیتی ہے تاکہ اقتصادی ترقی کو تیز کیا جا سکے اور روزگار کے مواقع پیدا ہوں۔ ایشین ڈیولپمنٹ بینک پاکستان کے سرکاری اور نجی دونوں شعبوں کے ساتھ مل کر اس وسیع ایجنڈے پر عملدرآمد میں معاونت کا خواہاں ہے۔

منیلا میں قائم اس کثیر الجہتی مالیاتی ادارے نے کہا کہ بیرونی جھٹکوں کے ایک سلسلے کے بعد پاکستان نے اپنی میکرو اکنامک صورتحال کو مستحکم کیا ہے اور اہم ساختی اصلاحات کا آغاز کیا ہے۔

نئی حکمت عملی اس بدلتے ہوئے معاشی پس منظر کے مطابق برآمدات اور سرمایہ کاری پر مبنی ترقی پر زور دیتی ہے، جس کی بنیاد بہتر سرکاری مالیاتی نظم و نسق، کاروبار دوست ماحول اور اہم شعبوں میں سرمایہ کاری ہوگی۔

اس حکمت عملی میں نجی شعبے کی ترقی کو مرکزی حیثیت حاصل ہے۔ اس کے تحت ایشین ڈیولپمنٹ بینک ضابطہ جاتی اور تعمیلی بوجھ کم کرنے، بنیادی ڈھانچے کو بہتر بنانے، مالی وسائل تک رسائی بڑھانے، پبلک پرائیویٹ پارٹنرشپ کو فروغ دینے اور نجی شعبے کی سرگرمیوں کو وسعت دینے کے لیے اصلاحات اور سرمایہ کاری کی حمایت کرے گا۔

اس حکمت عملی میں اہم معدنیات، ریلوے اور ملٹی موڈل رابطہ کاری، توانائی کے تحفظ اور صاف توانائی، زرعی پیداوار اور ویلیو چینز، مربوط آبی وسائل کے انتظام اور مہارتوں کی ترقی و روزگار کے مواقع جیسے شعبوں میں بڑی تبدیلی کے امکانات کی نشاندہی بھی کی گئی ہے۔

ابھرتے ہوئے چیلنجز سے مؤثر انداز میں نمٹنے کے لیے ایشین ڈیولپمنٹ بینک پاکستان میں پالیسی اصلاحات، خود مختار اور غیر خود مختار مالی معاونت، تکنیکی مدد اور علم کی فراہمی کو یکجا کرتے ہوئے جامع حل فراہم کرے گا۔

شمولیت اور بااختیاری کو فروغ دینے کے لیے ادارہ انسانی سرمائے کو مضبوط بنانے، معیاری سماجی خدمات تک رسائی بڑھانے اور خواتین کی اقتصادی شرکت کو فروغ دینے کے لیے سرمایہ کاری اور اصلاحات کو ترجیح دے گا۔

چونکہ پاکستان شدید موسمی حالات اور قدرتی آفات کے خطرات سے دوچار ہے، اس لیے لچک اور پائیداری اس حکمت عملی کا بنیادی ستون ہوں گے۔ ایشین ڈیولپمنٹ بینک آفات کے خطرات کے انتظام، موسمیاتی تبدیلی سے مطابقت اور اس کے اثرات میں کمی، سیلاب اور آبی وسائل کے مربوط انتظام، زرعی ویلیو چینز اور غذائی تحفظ، اور فضائی آلودگی میں کمی کے اقدامات کی بھی حمایت کرے گا۔

ایشین ڈیولپمنٹ بینک کے مطابق یہ حکمت عملی پاکستان کے نیشنل اکنامک ٹرانسفارمیشن پلان 2024 سے 2029 اور ادارے کی اسٹریٹیجی 2030 کے مڈ ٹرم ریویو سے ہم آہنگ ہے، جس کا مقصد مضبوط اقتصادی ترقی، سماجی شمولیت، لچک اور ماحولیاتی پائیداری کا حصول ہے۔

اس کے علاوہ یہ حکمت عملی عالمی بینک، انٹرنیشنل مانیٹری فنڈ اور دیگر ترقیاتی شراکت داروں کے ساتھ قریبی تعاون کو بھی مضبوط بنائے گی تاکہ ترقیاتی اقدامات کے اثرات کو زیادہ سے زیادہ بنایا جا سکے۔