ایران نے اسرائیل کے لیے مخبری کے الزام میں درجنوں افراد کو گرفتار کر لیا

ملک کے مختلف حصوں سے درجنوں افراد کو اسرائیل کے لیے مخبری کرنے اور حساس معلومات فراہم کرنے کے الزام میں گرفتار کر لیا گیا ہے۔ ایرانی میڈیا کے مطابق یہ گرفتاریاں ایک ایسے وقت میں ہوئی ہیں جب اسرائیل اور امریکہ کے جنگی طیارے ایران میں نئے اہداف کو نشانہ بنا رہے ہیں۔

تسنیم نیوز ایجنسی کے مطابق شمال مغربی ایران سے 20 افراد کو گرفتار کیا گیا جن پر ایرانی فوجی اور سیکیورٹی تنصیبات کی لوکیشن اسرائیل کو بھیجنے کا الزام ہے۔ اسی طرح شمال مشرقی ایران سے بھی 10 افراد حراست میں لیے گئے ہیں، جن پر معاشی انفرااسٹرکچر کی معلومات جمع کرنے کا شبہ ہے۔

پاسدارانِ انقلاب کے انٹیلیجنس ونگ کا کہنا ہے کہ صیہونی دشمن اور امریکہ حملے کے ساتھ ساتھ اپنے ایجنٹوں کے ذریعے ملک میں ہنگامے کروانے کی کوشش بھی کر رہے ہیں۔

رائٹرز کے مطابق اسرائیل اب زمینی مخبروں کی فراہم کردہ معلومات کی بنیاد پر سیکیورٹی چیک پوسٹوں کو نشانہ بنا رہا ہے، جو اس کی فوجی حکمتِ عملی کا نیا مرحلہ ہے۔ یاد رہے کہ جنوری میں امریکہ اور اسرائیل کی موجودہ جنگ کے آغاز سے قبل ایران میں حکومت مخالف بڑے پیمانے پر مظاہرے ہوئے تھے جنہیں سختی سے کچل دیا گیا تھا۔ ایرانی حکام ان ہنگاموں کا ذمہ دار امریکہ اور اسرائیل کو قرار دیتے ہیں۔