اوپیک پلس کا تیل کی پیداوار میں اضافے کا فیصلہ

اوپیک پلس نے اتوار کے روز اپریل سے یومیہ 206,000 بیرل تیل کی پیداوار بڑھانے کا فیصلہ کیا ہے، ایسے وقت میں جب ایران کے خلاف امریکا اور اسرائیل کی کارروائیوں اور تہران کی جوابی اقدامات کے باعث مشرقِ وسطیٰ سے تیل کی ترسیل متاثر ہو رہی ہے۔ آبنائے ہرمز میں کشیدگی کے بعد خطے سے تیل اور گیس کی ترسیل تقریباً معطل ہو چکی ہے، جس سے عالمی منڈی میں بے چینی پائی جاتی ہے۔

اوپیک پلس ماضی میں رسد میں خلل کے دوران پیداوار بڑھاتا رہا ہے، تاہم تجزیہ کاروں کا کہنا ہے کہ اس وقت تنظیم کے پاس اضافی پیداواری صلاحیت محدود ہے۔ سعودی عرب اور متحدہ عرب امارات کے سوا دیگر ارکان کے لیے فوری طور پر نمایاں اضافہ ممکن نہیں، جبکہ خلیج میں بحری آمد و رفت معمول پر آئے بغیر برآمدات میں بھی مشکلات رہیں گی۔ ذرائع کے مطابق ریاض نے حالیہ ہفتوں میں ایران پر ممکنہ امریکی حملوں کے پیش نظر اپنی پیداوار اور برآمدات میں اضافہ کیا۔

ہفتے سے آبنائے ہرمز کے راستے تیل اور دیگر اشیا کی ترسیل رک گئی ہے، جب جہاز مالکان کو ایران کی جانب سے خبردار کیا گیا کہ یہ گزرگاہ بند ہے۔ اتوار کو سیکڑوں جہاز لنگر انداز رہے۔ آبنائے ہرمز عالمی تیل کی ترسیل کا سب سے اہم راستہ ہے جہاں سے دنیا کی 20 فیصد سے زائد سپلائی گزرتی ہے۔

عالمی بینچ مارک برینٹ کروڈ کی قیمت جمعہ کو بڑھ کر 73 ڈالر فی بیرل ہو گئی، جبکہ اتوار کو غیر رسمی تجارت میں یہ 80 ڈالر کے قریب رہی۔ ماہرین کا کہنا ہے کہ محدود اضافے سے منڈی کو خاطر خواہ استحکام نہیں ملے گا اور قیمتوں کا انحصار خلیج کی صورتحال پر رہے گا۔ بعض تجزیہ کاروں نے خبردار کیا ہے کہ اگر تنازع پھیلتا ہے تو قیمتیں 100 ڈالر فی بیرل سے تجاوز کر سکتی ہیں۔