سیکورٹی فورسز نے خیبرپختونخوا میں 26، بلوچستان میں 8 دہشت گردوں کو ہلاک کردیا، آئی ایس پی آر

سیکورٹی فورسز نے گزشتہ چند روز کے دوران خیبر پختونخوا اور بلوچستان میں انٹیلی جنس بیسڈ آپریشنز (آئی بی اوز) کے دوران 34 بھارت کے حمایت یافتہ دہشت گرد ہلاک کر دیے ہیں۔ یہ بات پاک فوج کے شعبہ تعلقات عامہ کے ادارے(آئی ایس پی آر) نے بدھ کے روز جاری ایک بیان میں بتائی ہے۔

انٹر سروسز پبلک ریلیشنز (آئی ایس پی آر) کے بیان کے مطابق 24 فروری کو خیبر پختونخوا میں چار الگ الگ جھڑپوں میں 26 دہشت گرد ہلاک ہوئے، جبکہ بلوچستان کے ضلع ژوب کے علاقے سامبازہ میں ایک آپریشن کے دوران دیگر آٹھ دہشت گرد بھی ہلاک کر دیئے گئے۔

آئی ایس پی آر کے مطابق سیکورٹی فورسز نے شمالی وزیرستان کے علاقے حسن خیل کے بندوبستی علاقے میں پاکستان اور افغانستان سرحد کے ذریعے دراندازی کی کوشش کرنے والے دہشت گردوں کے گروہ کی حرکت کا پتہ لگایا۔

سیکورٹی فورسز نے اس گروہ سے مقابلہ کیا اور ایک دہشت گرد ہلاک کر دیا، جس کی شناخت آئی ایس پی آر کے بیان کے مطابق افغان شہری کے طور پر کی گئی۔

لکی مروت کے ضلع میں ایک الگ انٹیلی جنس بیسڈ آپریشن کے دوران بھی فائرنگ کے تبادلے کے بعد تین دہشت گرد ہلاک ہوئے۔

بیان میں مزید بتایا گیا ہے کہ سیکورٹی فورسز نے بنوں کے علاقے نرمی خیل میں بھی دو آپریشن کیے، جن میں 10 دہشت گرد غیر مؤثر ہوئے۔ شمالی وزیرستان کے ضلع میرعلی میں ایک اور جھڑپ کے دوران 12 عسکریت پسند ہلاک ہوئے۔

ژوب کے ضلع سامبازہ میں پانچویں جھڑپ کے دوران شدید فائرنگ کے تبادلے کے بعد آٹھ دہشت گرد ہلاک ہوئے۔

ترجمان پاک فوج کے مطابق مارے گئے دہشت گردوں سے ہتھیار اور گولہ بارود برآمد ہوئے، اور یہ مبینہ طور پر متعلقہ علاقوں میں متعدد دہشت گردانہ سرگرمیوں میں ملوث تھے۔

آئی ایس پی آر نے کہا ہے کہ باقی دہشت گردوں کو ختم کرنے کے لیے کلیئرنس آپریشنز جاری ہیں اور اس بات پر زور دیا کہ سیکورٹی فورسز، قانون نافذ کرنے والے اداروں کے ساتھ مل کر ”عزمِ استحکام“ کے وژن کے تحت ملک سے دہشت گردی کے خاتمے کے لیے کارروائیاں جاری رکھیں گی۔