اب اسپنرز کا سامنا کرنا ہوگا، انگلینڈ کی لڑکھڑاتی بیٹنگ کو پاکستان کا چیلنج

پاکستان نے ٹی ٹوئنٹی ورلڈ کپ کے سپر ایٹ مرحلے میں انگلینڈ کی غیر مستقل مزاج بیٹنگ لائن کو اسپن باؤلنگ کے کڑے امتحان کے لیے تیار رہنے کا انتباہ جاری کر دیا ہے۔ پاکستانی بلے باز صاحبزادہ فرحان نے میڈیا سے گفتگو کرتے ہوئے کہا کہ اتوار کو سری لنکا کے اسپنرز کے خلاف انگلینڈ کی ٹیم محض 146 رنز پر 9 وکٹیں گنوا کر شدید مشکلات کا شکار نظر آئی۔

انہوں نے واضح کیا کہ منگل کی شب کینڈی کے اسی میدان پر پاکستانی اسپنرز بھی انگلینڈ کے لیے ایسی ہی صورتحال پیدا کریں گے۔

نیوزی لینڈ کے خلاف پہلا میچ بارش کی نذر ہونے کے بعد پاکستان کے لیے یہ جیت ناگزیر ہے۔ شکست کی صورت میں انگلینڈ سیمی فائنل میں پہنچ جائے گا، جبکہ پاکستان کو دیگر نتائج پر انحصار کرنا ہوگا۔ فرحان، جو 220 رنز کے ساتھ ٹورنامنٹ کے ٹاپ اسکورر ہیں نے کہا کہ سری لنکا کے پاس ایک دو اسپنرز تھے لیکن ہمارے پاس پانچ ہیں جو انگلینڈ کو ٹف ٹائم دیں گے۔

رپورٹ کے مطابق پاکستان الیون میں فہیم اشرف کی جگہ ابرار احمد کی شمولیت کا امکان ہے۔ اگرچہ تاریخ انگلینڈ کے حق میں ہے، مگر صاحبزادہ فرحان پرامید ہیں کہ وہ جوفرا آرچر جیسے تیز باؤلرز کا مقابلہ کرنے کے لیے مکمل تیار ہیں۔