ایران کی آبنائے ہرمز کے قریب بحری مشقیں، خام تیل کی قیمتیں مستحکم

عالمی منڈی میں تیل کی قیمتیں منگل کو مستحکم رہیں کیونکہ سرمایہ کاروں نے ایران کی جانب سے آبنائے ہرمز کے قریب بحری مشقوں کے بعد ممکنہ سپلائی رکاوٹوں کے خدشات کا جائزہ لیا۔ یہ مشقیں امریکا کے ساتھ جنیوا میں متوقع جوہری مذاکرات سے قبل کی گئیں۔

امریکی صدر ڈونلڈ ٹرمپ نے پیر کو کہا کہ وہ مذاکرات میں بالواسطہ طور پر شامل ہوں گے اور ان کا خیال ہے کہ تہران معاہدہ کرنا چاہتا ہے۔ تاہم انہوں نے ویک اینڈ پر یہ بھی کہا تھا کہ ایران میں رجیم چینج بہترین پیش رفت ہو سکتی ہے۔

برینٹ کروڈ فیوچرز 0.2 فیصد کمی کے ساتھ 68.59 ڈالر فی بیرل پر آ گئے، حالانکہ پیر کو اس میں 1.3 فیصد اضافہ ہوا تھا۔ امریکی ویسٹ ٹیکساس انٹرمیڈیٹ کروڈ( ڈبلیو ٹی آئی) 63.73 ڈالر فی بیرل پر تھا جو 84 سینٹ یا 1.34 فیصد اضافے کو ظاہر کرتا ہے، تاہم اس میں پیر کی مکمل قیمتوں کی حرکت شامل تھی کیونکہ یومِ صدارت کی تعطیل کے باعث باقاعدہ سیٹلمنٹ نہیں ہوئی تھی۔

چین، ہانگ کانگ، تائیوان، جنوبی کوریا اور سنگاپور سمیت کئی ایشیائی منڈیاں نئے قمری سال کی تعطیلات کے باعث بند رہیں۔

اے این زیڈ کے تجزیہ کار ڈینیئل ہائنس کے مطابق مارکیٹ جغرافیائی سیاسی غیر یقینی صورتحال کے باعث دباؤ میں ہے۔ ان کا کہنا تھا کہ اگر مشرق وسطیٰ میں کشیدگی کم ہوتی ہے یا یوکرین کے معاملے میں پیش رفت ہوتی ہے تو تیل کی قیمتوں میں شامل رسک پریمیم تیزی سے ختم ہو سکتا ہے، تاہم کسی منفی پیش رفت یا کشیدگی میں اضافے سے قیمتیں اوپر جا سکتی ہیں۔

ایران نے پیر کو آبنائے ہرمز میں فوجی مشقیں شروع کیں، جو خلیجی عرب ممالک کے لیے تیل برآمد کرنے کا اہم راستہ ہے۔ ایران کے ساتھ سعودی عرب، متحدہ عرب امارات، کویت اور عراق بھی اپنی زیادہ تر خام تیل برآمدات اسی راستے سے خصوصاً ایشیا کو بھیجتے ہیں۔

ادھر سٹی بینک نے کہا ہے کہ اگر روسی سپلائی میں رکاوٹ کے باعث برینٹ 65 سے 70 ڈالر فی بیرل کے درمیان رہتا ہے تو اوپیک پلس اضافی پیداواری گنجائش استعمال کرتے ہوئے پیداوار بڑھا سکتا ہے۔ ذرائع کے مطابق اوپیک پلس اپریل سے پیداوار میں اضافے کی بحالی پر غور کر رہا ہے جبکہ سٹی بینک کا اندازہ ہے کہ ایران اور روس یوکرین معاملات میں پیش رفت سے برینٹ قیمتیں 60 سے 62 ڈالر فی بیرل تک آ سکتی ہیں۔