فلسطین کیلئے امدادی سامان کی 28 ویں کھیپ روانہ، مجموعی امداد 2727 ٹن تک پہنچ گئی

وزیراعظم پاکستان کی ہدایت پر نیشنل ڈیزاسٹر مینجمنٹ اتھارٹی (این ڈی ایم اے) نے فلسطین کے لیے مزید امدادی سامان روانہ کر دیا ہے۔

این ڈی ایم اے کے میڈیا ونگ کے مطابق الخدمت فاؤنڈیشن کے تعاون سے 100 ٹن سامان پر مشتمل 28 ویں امدادی کھیپ بھیجی گئی۔ امدادی سامان میں 100 ٹن خیمے شامل ہیں جو خصوصی پرواز کے ذریعے علامہ اقبال انٹرنیشنل ایئرپورٹ لاہور سے روانہ کیے گئے۔

حکام کے مطابق اب تک 28 امدادی کھیپوں کے ذریعے فلسطین بھجوائی جانے والی مجموعی امداد کا وزن 2727 ٹن ہو چکا ہے۔

سامان کی روانگی کی تقریب میں وزیرِ ہاؤسنگ پنجاب اور رکن صوبائی اسمبلی میاں بلال یاسین بطور مہمانِ خصوصی شریک ہوئے۔ تقریب میں این ڈی ایم اے اور وزارتِ خارجہ کے افسران کے علاوہ حکومتی نمائندوں اور الخدمت فاؤنڈیشن کے عہدیداران نے بھی شرکت کی۔

حکومتِ پاکستان نے اس عزم کا اعادہ کیا ہے کہ وہ مشکل وقت میں فلسطین کے عوام کے ساتھ کھڑی ہے اور ان کی ضروریات پوری کرنے کے لیے ہر ممکن اقدامات جاری رکھے گی۔