گردشی قرضوں میں 224 ارب روپے اضافے کی خبریں مسترد، پاور ڈویژن نے رپورٹ گمراہ کن قرار دے دی

وزارت توانائی (پاور ڈویژن) نے ان میڈیا رپورٹس کو سختی سے مسترد کر دیا ہے جن میں دعویٰ کیا گیا تھا کہ جولائی تا نومبر 2025 کے دوران گردشی قرضوں میں 224 ارب روپے کا اضافہ ہوا ہے۔ ترجمان پاور ڈویژن نے ان خبروں کو گمراہ کن اور حقائق کے برعکس قرار دیتے ہوئے کہا کہ اس میں حالیہ ڈیٹا کو نظر انداز اور وزارت کا موقف بھی شامل نہیں کیا گیا۔

ترجمان کے مطابق جون 2025 کے اسٹاک کا موازنہ نومبر 2025 سے کرنا درست نہیں ہے، کیونکہ گردشی قرضوں میں اضافہ موسمیاتی عوامل کی وجہ سے ہوتا ہے جو مالی سال کے اختتام تک ختم ہو جاتا ہے۔

وزارت نے واضح کیا کہ دسمبر 2025 میں گردشی قرضوں کے بہاؤ میں کمی آئی ہے، جس کے بعد جولائی تا دسمبر کے عرصے میں خالص اضافہ 80 ارب روپے سے بھی کم رہ گیا ہے۔ پاور ڈویژن کو توقع ہے کہ رواں مالی سال کے اختتام تک گردشی قرضوں کی پوزیشن پر مکمل قابو پا لیا جائے گا۔

بیان میں مزید کہا گیا کہ ڈسکوز کی نااہلی کی وجہ سے ہونے والے نقصانات میں گزشتہ سال کے مقابلے میں 193 ارب روپے کی کمی لائی گئی ہے۔

حکومت 1,225 ارب روپے کا گردشی قرضہ سیٹلمنٹ پلان نافذ کر رہی ہے جس کے تحت اگلے چھ برس میں اس قرض کو مکمل طور پر ختم کر دیا جائے گا۔ اس منصوبے کی پہلی قسط موصول ہو چکی ہے اور اس سے صارفین کے لیے بجلی کے ٹیرف پر کوئی بوجھ نہیں پڑے گا۔