تنازعات کے باوجود بنگلہ دیشی کھلاڑی نارمل رہنے کی اداکاری کرتے ہیں ، کپتان نجم الحسین شانتو کا انکشاف

بنگلہ دیشی ٹیسٹ کپتان نجم الحسین شانتو نے انکشاف کیا ہے کہ بڑے ٹورنامنٹس سے قبل پیدا ہونے والے تنازعات کھلاڑیوں کی ذہنی حالت اور کارکردگی پر گہرا اثر ڈالتے ہیں، مگر وہ پیشہ ورانہ مجبوری کے تحت اسے چھپانے کی کوشش کرتے ہیں۔

بھارت میں سکیورٹی خدشات کے باعث بنگلہ دیش کرکٹ بورڈ (بی سی بی) کی جانب سے ورلڈ کپ میچز کی منتقلی کے مطالبے نے ٹیم کی شرکت پر سوالیہ نشان لگا دیا ہے۔ شانتو کے مطابق ہر ورلڈ کپ سے پہلے کسی نہ کسی واقعے کا رونما ہونا کھلاڑیوں کے لیے ذہنی دباؤ کا باعث بنتا ہے۔ انہوں نے کہا کہ اگرچہ ہم ظاہر کرتے ہیں کہ کچھ نہیں ہوا، مگر حقیقت میں یہ صورتحال آسان نہیں ہوتی۔

یاد رہے کہ بھارت اور بنگلہ دیش کے درمیان حالیہ مذہبی و سیاسی کشیدگی کی وجہ سے کولکتہ میں شیڈول تین میچز خطرے میں ہیں۔ بھارتی میڈیا کے مطابق آئی سی سی نے میچز نہ کھیلنے کی صورت میں پوائنٹس ختم کرنے کی دھمکی دی ہے، تاہم بنگلہ دیشی بورڈ نے اسے جھوٹا قرار دیتے ہوئے افہام و تفہیم سے حل تلاش کرنے کی امید ظاہر کی ہے۔ شانتو کا کہنا ہے کہ کھلاڑیوں کو ان معاملات سے بالاتر ہو کر کارکردگی دکھانی ہوگی۔