اسرائیلی حملوں میں 5 بچوں سمیت 13 افراد شہید

غزہ کی سول ڈیفنس ایجنسی نے بتایا ہے کہ فلسطینی علاقے میں اسرائیلی حملوں میں 5 بچوں سمیت کم از کم 13 افراد شہید ہو گئے، حالانکہ وہاں جنگ بندی (سیز فائر) نافذ ہے جس نے بڑی حد تک لڑائی کو روک رکھا ہے۔

ایجنسی کے ترجمان محمود بصل نے غیر ملکی خبر رساں ادارے (اے ایف پی) کو بتایا کہ جنوبی غزہ میں بے گھر افراد کے ایک خیمے پر ڈرون حملے میں تین بچوں سمیت چار افراد جان بحق ہوئے۔ ایجنسی نے مزید بتایا کہ شمالی غزہ کی پٹی میں جبالیہ پناہ گزین کیمپ کے قریب ایک 11 سالہ بچی شہید ہوئی، ایک اسکول پر حملے میں ایک شخص جاں بحق ہوا، جبکہ جنوب میں خان یونس کے قریب ڈرون حملے میں ایک شخص مارا گیا۔

حماس کے زیرِ انتظام کام کرنے والے اس ادارے نے رپورٹ کیا کہ دیگر حملوں میں ایک بچے سمیت مزید دو غزہ کے رہائشی شہید ہوئے۔

محمود بصل کے مطابق جمعرات کی شام گئے غزہ شہر کے مشرقی علاقے میں ایک گھر کو نشانہ بنانے والے اسرائیلی فضائی حملے میں مزید چار افراد شہید ہوئے۔ انہوں نے مزید کہا کہ لاپتہ ہونے والے کئی افراد کی تلاش کے لیے ریسکیو کام شروع کر دیا گیا ہے۔

بصل نے کہا آج صبح سے غزہ کی پٹی پر اسرائیلی حملوں کے نتیجے میں شہادتوں کی تعداد 13 ہو گئی ہے، جو کہ جنگ بندی کے معاہدے کی کھلی خلاف ورزی ہے۔