ٹرمپ اور زیلنسکی کی ملاقات کے نتائج کا جائزہ لینے کے دوران خام تیل کی قیمتوں میں اضافہ

خام تیل کی قیمتوں میں پیر کو اضافہ ریکارڈ کیا گیا جس کی وجہ سے سرمایہ کاروں کی جانب سے روس یوکرین جنگ کے خاتمے کے لیے امریکی اور یوکرینی صدور کے درمیان ممکنہ معاہدے پر ہونے والے مذاکرات کے نتائج کا جائزہ لینا ہے۔ اس کے ساتھ ساتھ مشرقِ وسطیٰ میں جاری تناؤ بھی قیمتوں میں اضافے کا باعث ہے، جس سے تیل کی ترسیل (سپلائی) متاثر ہونے کا خدشہ ہے۔

برنٹ کروڈ فیوچرز 63 سینٹ یا 1.04 فیصد بڑھ کر 61.27 ڈالر فی بیرل پر پہنچ گئے جبکہ امریکی ویسٹ ٹیکساس انٹرمیڈیٹ (ڈبلیو ٹی آئی) کروڈ 58 سینٹ یا 1.02 فیصد اضافے سے 57.32 ڈالر فی بیرل پر ٹریڈ کررہا تھا۔

جمعہ کو دونوں بینچ مارک تیل کی قیمتیں 2 فیصد سے زائد گرگئیں، کیونکہ سرمایہ کار عالمی سطح پر ممکنہ سپلائی بڑھنے اور یوکرینی صدر ولودیمیر زیلنسکی اور امریکی صدر ڈونلڈ ٹرمپ کے درمیان ہفتے کے آخر میں ہونے والے مذاکرات سے پہلے یوکرین میں امن معاہدے کے امکانات پر غور کررہے تھے۔

امریکی صدر ڈونلڈ ٹرمپ نے اتوار کو کہا کہ وہ اور یوکرینی صدر ولودیمیر زیلنسکی یوکرین کی جنگ ختم کرنے کے معاہدے کے لیے کافی قریب، شاید بہت قریب ہیں۔

دونوں رہنماؤں نے فلوریڈا میں ملاقات کے بعد اتوار کی دوپہر دیر گئے مشترکہ پریس کانفرنس میں بات کی۔ ٹرمپ نے کہا کہ چند ہفتوں میں واضح ہو جائے گا کہ آیا جنگ ختم کرنے کے مذاکرات کامیاب ہوں گے یا نہیں۔

چائنا فیوچرز کمپنی لمیٹڈ کے انرجی اور کیمیکل چیف ریسرچر منگیو گاؤ نے کہا کہ امن مذاکرات میں علاقائی مسائل پر کوئی معاہدہ نہیں ہوا، اس لیے روس-یوکرین امن معاہدہ بغیر فوری پیش رفت کے جامد رہ سکتا ہے۔

چائنا کے ہیٹونگ فیوچرز کے تجزیہ کار یانگ آن نے کہا کہ قیمتوں میں اضافے کی ایک وجہ یہ بھی ہے کہ جغرافیائی سیاسی کشیدگی بلند ہے، کیونکہ روس اور یوکرین نے ہفتے کے آخر میں ایک دوسرے کے توانائی کے بنیادی ڈھانچے پر حملے جاری رکھے۔

یانگ نے مزید کہا کہ مشرق وسطیٰ میں بھی حالیہ دنوں میں بےچینی رہی ہے، جس میں سعودی عرب کے یمن میں ہوائی حملے اور ایران کی جانب سے امریکہ، یورپ اور اسرائیل کے ساتھ مکمل جنگ کے بیانات شامل ہیں۔ یہ ممکنہ سپلائی میں رکاوٹوں کے حوالے سے مارکیٹ کی تشویش کی ایک وجہ ہو سکتی ہے۔