گیس سیکٹر میں اصلاحات: حکومت اور ورلڈ بینک کے درمیان روڈ میپ پر تبادلہ خیال

حکومتِ پاکستان اور ورلڈ بینک نے گیس کے شعبے میں اصلاحات کے لیے مجوزہ روڈ میپ پر تبادلہ خیال کیا، جس میں طویل المدتی پائیداری، کارکردگی میں بہتری اور ساختی تبدیلیوں پر توجہ مرکوز کی گئی۔

وزارتِ پیٹرولیم کے مطابق وفاقی وزیر پیٹرولیم علی پرویز ملک اور پاکستان کے لیے ورلڈ بینک کی کنٹری ڈائریکٹر بولورما امگابازر کے درمیان ملاقات کے موقع پر گفتگو ہوئی۔

وزارتِ پیٹرولیم کے مطابق ورلڈ بینک کی کنٹری ڈائریکٹر نے اضافی مائع قدرتی گیس (ایل این جی) کے دیرینہ مسئلے کے حل پر پیٹرولیم ڈویژن کی کارکردگی کو سراہا اور اسے ایک پیچیدہ چیلنج قرار دیا۔

انہوں نے گیس سیکٹر میں اصلاحات کے لیے ورلڈ بینک کی مسلسل حمایت کا اعادہ کیا اور مائع پیٹرولیم گیس (ایل پی جی) کے شعبے میں اصلاحات اور آئل اینڈ گیس ریگولیٹری اتھارٹی (اوگرا) کی صلاحیت سازی کے لیے تعاون پر آمادگی ظاہر کی۔

وزارت نے بتایا کہ ورلڈ بینک پہلے ہی پیٹرولیم ڈویژن کے ساتھ مل کر گیس سیکٹر اصلاحات کے لیے ایک جامع روڈ میپ تیار کر رہا ہے، جس میں گیس کے شعبے میں کارکردگی بہتر بنانے کے اقدامات کے ساتھ ساتھ سوئی گیس کمپنیوں کی ان بنڈلنگ سے متعلق آپشنز بھی شامل ہیں۔

وفاقی وزیر علی پرویز ملک نے حکومت کی کوششوں کو سراہنے پر ورلڈ بینک کا شکریہ ادا کیا اور کہا کہ مؤثر اور پائیدار پالیسی اصلاحات کی تشکیل میں بین الاقوامی شراکت داروں کی آرا نہایت اہم ہیں۔

انہوں نے گیس سیکٹر کی طویل المدتی پائیداری یقینی بنانے کے لیے ساختی اور ادارہ جاتی اصلاحات سے حکومت کے عزم کا اعادہ کیا۔

وزارت کے مطابق وفاقی وزیر نے فضائی معیار میں بہتری کو بھی حکومت کی ترجیح قرار دیا اور کہا کہ ایندھن کے معیارات بہتر بنانے کے لیے اقدامات جاری ہیں، جس کے لیے پاکستان کی ریفائنریوں کو اپ گریڈ کرنا ضروری ہوگا۔

وزارتِ پیٹرولیم کے مطابق دونوں فریقین نے توانائی کے شعبے میں اصلاحات اور پاکستان کے وسیع تر پائیدار ترقی کے اہداف کے حصول کے لیے باہمی تعاون جاری رکھنے کے عزم کا اعادہ کیا۔