ترکیہ کی بڑی تعمیراتی کمپنی پاکستان کے انفرااسٹرکچر منصوبوں میں سرمایہ کاری کی خواہاں

وفاقی وزیرِ مواصلات عبدالعلیم خان سے ترکیہ کی معروف کمپنی اچ ہولڈنگ کے ٹرانسپورٹیشن اینڈ انفرااسٹرکچر گروپ کے اعلیٰ سطح وفد نے چیف ایگزیکٹو آفیسر سیرہات سوؤکپنار کی قیادت میں استنبول میں ملاقات کی۔

ملاقات کے دوران وفاقی وزیر نے وفد کو پاکستان کے انفرااسٹرکچر سیکٹر میں دستیاب وسیع سرمایہ کاری کے مواقع سے آگاہ کیا۔

انہوں نے کہا کہ حکومت پاکستان ملک کے ٹرانسپورٹ اور کمیونیکیشن سسٹم کو جدید خطوط پر استوار کرنے کے لیے پرعزم ہے اور بین الاقوامی سرمایہ کاروں کو سرمایہ کار دوست پالیسیوں سے بھرپور فائدہ اٹھانا چاہیے۔

عبدالعلیم خان نے عالمی شہرت یافتہ انفرااسٹرکچر کمپنیوں کے ساتھ مضبوط شراکت داری کے قیام میں گہری دلچسپی کا اظہار کرتے ہوئے کہا کہ ایسے اشتراک سے ترقیاتی منصوبوں میں تیزی اور معاشی ترقی کے نئے دروازے کھلیں گے۔

اچ ہولڈنگ کے وفد نے پاکستان میں مستقبل کے انفرااسٹرکچر منصوبوں میں تعاون اور سرمایہ کاری کے امکانات کا جائزہ لینے میں بھرپور دلچسپی ظاہر کی۔ ملاقات اس عزم کے ساتھ اختتام پذیر ہوئی کہ دونوں فریق قریبی رابطہ برقرار رکھتے ہوئے پاکستان کے بڑھتے ہوئے انفراسٹرکچر سیکٹر میں عملی تعاون کے مواقع تلاش کریں گے۔

واضح رہے کہ اچ ہولڈنگ ترکیہ کا ایک بڑا اور متنوع کاروباری گروپ ہے، جو 1969 میں قائم ہوا۔ یہ گروپ تعمیرات، انفرااسٹرکچر، توانائی، سیاحت اور صنعتی شعبوں میں نمایاں سرگرمیاں رکھتا ہے اور پل، موٹرویز، بندرگاہیں، ہوائی اڈے، اور توانائی کی پیداوار و تقسیم جیسے بڑے منصوبوں کی تعمیر کا وسیع تجربہ رکھتا ہے۔