پٹرول اور ڈیزل کی قیمتوں میں کمی کا امکان

حکومت سے توقع کی جارہی ہے کہ وہ یکم دسمبر سے پٹرولیم مصنوعات کی قیمتیں کم کرے گی کیونکہ عالمی تیل کی کمزور مارکیٹیں اور ریفائن شدہ مصنوعات کی گرتی ہوئی قیمتیں کافی گنجائش پیدا کر رہی ہیں۔

عارف حبیب لمیٹڈ (اے ایچ ایل)کی جانب سے جمعہ کو جاری تازہ ترین تخمینوں کے مطابق دونوں اہم ایندھن پٹرول اور ہائی اسپیڈ ڈیزل (ایچ ایس ڈی) میں کمی متوقع ہے جو دسمبر کے آغاز میں کار چلانے والوں اور کاروباری اداروں کے لیے ممکنہ ریلیف فراہم کرے گی۔

اعدادوشمار کے مطابق 17 سے 27 نومبر کے دوران عالمی منڈی میں خام تیل کی قیمتوں میں کمی ریکارڈ کی گئی ۔ برینٹ کی اوسط قیمت 63.43 ڈالر فی بیرل رہی جو 2.5 فیصد کمی کو ظاہر کرتی ہے جبکہ ڈبلیو ٹی آئی کی قیمت 1.4 فیصد کمی کے ساتھ 59.04 ڈالر فی بیرل رہی۔

عرب لائٹ کی قیمت بھی 2.2 فیصد کمی کے ساتھ 65.61 ڈالر فی بیرل رہی۔ اسی طرح پٹرول کی قیمت 2.7 فیصد کم ہو کر 74.32 ڈالر فی بیرل اور ڈیزل کی قیمت 3.8 فیصد کمی کے ساتھ 88.76 ڈالر فی بیرل رہی۔

قیمتوں کے فارمولے کے مطابق یکم سے 15 دسمبر کے لیے ڈیزل کی قیمت میں فی لیٹر 6.50 روپے کمی متوقع ہے جس کے بعد نئی قیمت تقریباً 271.94 روپے فی لٹر ہوگی جبکہ پچھلی قیمت 278.44 روپے تھی۔ اسی طرح، پٹرول کی قیمت میں 4.15 روپے فی لیٹر کمی متوقع ہے جس کے نتیجے میں نئی قیمت 261.30 روپے فی لٹر ہوگی جبکہ پچھلی قیمت 265.45 روپے تھی۔

عارف حبیب لمیٹڈ نے کہا کہ ہمارے تخمینوں کے مطابق ڈیزل کی قیمت میں 6.50 روپے فی لیٹر کمی جبکہ پٹرول کی قیمت میں 4.15 روپے فی لٹر کمی متوقع ہے جو یکم دسمبر 2025 سے نافذ العمل ہوگی۔

بروکریج ہاؤس نے پٹرولیم مصنوعات کی قیمتوں میں کمی کی وجہ بین الاقوامی تیل کی مارکیٹس میں کمزوری قرار دی جس کے تحت عرب لائٹ کی قیمت پچھلے پندرہ دن کے مقابلے میں 2.2 فیصد کم ہوئی۔

علاوہ ازیں ڈیزل اور پٹرول کے پروڈکٹ اسپریڈز میں بالترتیب 8 فیصد اور 6 فیصد کی کمی واقع ہوئی ہے۔

آئل اینڈ گیس ریگولیٹری اتھارٹی (اوگرا) 30 نومبر تک اپنی سمری وزارت خزانہ کو جمع کرانے والی ہے۔ اگرچہ حتمی اعلان میں ابھی تین دن باقی ہیں لیکن وسیع پیمانے پر توقع کی جا رہی ہے کہ حکومت اس کمی کی منظوری دے گی۔