ستارہ پر آکسائیڈ نے بی ایم آر منصوبے کے تحت پیداواری سرگرمیاں معطل کردیں

ستارہ پر آکسائیڈ لمیٹڈ (ایس پی ایل) نے جمعرات کو اعلان کیا ہے کہ کمپنی نے اپنی پیداواری سرگرمیاں تجدید، جدید کاری اور نظام کی بہتری (بی ایم آر)” کے منصوبے کے تحت عارضی طور پر معطل کر دی ہیں۔

کیمیکل ساز کمپنی نے پاکستان اسٹاک ایکسچینج (پی ایس ایکس) کو جاری کردہ ایک نوٹس میں یہ اطلاع دی۔

نوٹس کے مطابق انتظامیہ نے ہنگامی اقدامات شروع کر دیے ہیں تاکہ موسم میں اچانک تبدیلی کے باعث ہونے والے نقصان کو روکا جاسکے جس سے نہایت آتش گیر اور قیمتی کیمیکلز کے اخراج کا خطرہ پیدا ہوگیا تھا۔

ستارہ پر آکسائیڈ کے مطابق کمپنی اپنے تمام وسائل حفاظتی اقدامات پر مرکوز کر رہی ہے اور تمام فریقین کو اس بارے میں آگاہ کر رہی ہے۔

پلانٹ اور مشینری، ملازمین اور ماحول کے تحفظ کو اولین ترجیح دیتے ہوئے تمام حفاظتی، ہنگامی اور ماحولیاتی ردعمل کے پروٹوکول مکمل طور پر فعال کر دیے گئے ہیں۔

ستارہ پر آکسائیڈ لمیٹڈ کو کمپنیز آرڈیننس 1984 کے تحت پاکستان میں ایک پبلک لمیٹڈ کمپنی کے طور پر رجسٹر کیا گیا۔

کمپنی کی بنیادی سرگرمی ہائیڈروجن پر آکسائیڈ (H₂O₂) اور ستارہ سیف (جراثیم کش محلول) کی تیاری اور فروخت ہے۔