قرضوں کی ادائیگی کے کم اخراجات سے حکومت کو 500 ارب روپے کی بچت کا امکان

پاکستان مالی سال 2025-26 میں قرضوں کی ادائیگی کے کم اخراجات اور مستحکم شرحِ سود کے باعث 500 ارب روپے تک کی بچت کی توقع کر رہا ہے۔ وزارت خزانہ کے ڈائریکٹر جنرل (ڈیٹ) محسن مشتاق نے بدھ کے روز سسٹین ایبل ڈیولپمنٹ پالیسی انسٹیٹیوٹ (ایس ڈی پی آئی) کے زیر اہتمام منعقدہ سسٹین ایبل ڈیولپمنٹ کانفرنس سے خطاب کرتے ہوئے یہ بات کہی۔

انہوں نے کہا کہ بیرونی قرضے سے متعلق عوامی قیاس آرائیاں نقصان دہ ثابت ہو سکتی ہیں، اس لیے حساس مالی معلومات کے حوالے سے ذمہ دارانہ رویہ اپنانا ضروری ہے تاکہ مارکیٹ میں غیر یقینی صورتحال پیدا نہ ہو۔ ان کا کہنا تھا کہ پاکستان نے بین الاقوامی مالیاتی فنڈ (آئی ایم ایف) کی سفارشات کے مطابق شفاف اور جدید قرضہ رپورٹنگ فریم ورک اپنایا ہے، جس کے تحت ششماہی قرضہ رپورٹس جاری کی جاتی ہیں اور مارکیٹ کے لیے پیش بینی کو یقینی بنانے کے لیے نیلامی کیلنڈر پر سختی سے عمل کیا جاتا ہے۔

محسن مشتاق نے بتایا کہ حکومت نے مالی سال 2025 تا 2028 کے لیے درمیانی مدت کی قرضہ حکمتِ عملی تیار کر لی ہے، جب کہ مختلف اداروں کے درمیان ہم آہنگی، رپورٹنگ اور نگرانی بہتر بنانے کے لیے قرضہ کوآرڈینیشن کمیٹی قائم کی گئی ہے۔ ان کے مطابق عوامی قرضے کی تعریف پر تکنیکی اختلافات موجود ہیں، تاہم اس کا حتمی فیصلہ پارلیمنٹ کا اختیار ہے۔

قومی اسمبلی کی قائمہ کمیٹی برائے خزانہ و محصولات کے چیئرمین سید نوید قمر نے کہا کہ پاکستان کا قرضہ بوجھ ناقابل برداشت ہو چکا ہے اور ملک مزید اندھا دھند قرض نہیں لے سکتا۔ انہوں نے کہا کہ قرضوں کے غیر محتاط استعمال نے معیشت کو نازک موڑ پر لا کھڑا کیا ہے، اور اب وقت آ گیا ہے کہ پارلیمنٹ قرض لینے کے عمل پر براہِ راست کنٹرول حاصل کرے۔

نوید قمر نے کہا کہ قرضوں کی ادائیگی بجٹ کا بڑا حصہ نگل رہی ہے، جس سے مالی گنجائش ختم ہو رہی ہے۔ انہوں نے تجویز دی کہ قرضوں کی شرائطِ ازسرِ نو طے کی جائیں اور بے احتیاط قرض لینا بند کیا جائے۔ ان کے مطابق آئی ایم ایف پروگرام کے تحت اصلاحات کو برقرار رکھتے ہوئے حکومت کو مالی گنجائش پیدا کرنے کے طریقے تلاش کرنے ہوں گے۔

انہوں نے کہا کہ حکومتوں نے ہمیشہ قرض لینے پر کوئی پابندی نہیں رکھی، جس کا نتیجہ بحران کی صورت میں سامنے آیا ہے۔ اب وقت آ گیا ہے کہ پارلیمنٹ قرضہ جات کی منظوری اور نگرانی میں فعال کردار ادا کرے۔ ان کے مطابق بیرونی قرضہ جات کی منظوری پہلے پارلیمنٹ سے ہونی چاہیے، جس کے بعد اندرونی قرضوں کی جانچ پڑتال کا نظام بنایا جائے۔

وزارت خزانہ خیبر پختونخوا کے مشیر مزمل اسلم نے تجویز دی کہ پاکستان میں ایک خودمختار قرضہ رپورٹنگ اتھارٹی قائم کی جائے، جو پاکستان بیورو آف اسٹیٹکس (پی بی ایس) کی طرز پر تمام قرضہ جات کا شفاف حساب رکھے۔ ان کے مطابق پاکستان کا حقیقی قرضہ سرکاری اندازے سے کہیں زیادہ ہے، کیونکہ متعدد مالی ذمہ داریاں قرضہ کھاتے میں شامل نہیں۔

انہوں نے بتایا کہ جولائی تا اکتوبر 2025 کے دوران قومی مالیاتی کمیشن (این ایف سی) فارمولے کے تحت صرف خیبر پختونخوا کو 65 ارب روپے کی ادائیگی باقی ہے، جب کہ مجموعی صوبائی واجبات 300 ارب روپے تک پہنچ چکی ہیں۔ ان کا کہنا تھا کہ بجلی و گیس کے گردشی قرضے، پنشن واجبات اور روشن ڈیجیٹل اکاؤنٹس سے منسلک مالی ذمہ داریاں بھی سرکاری قرضہ اعدادوشمار میں شامل نہیں، جن کی مالیت تقریباً 12.3 کھرب روپے ہے۔

مزمل اسلم نے کہا کہ اگر ان ذمہ داریوں کو شامل کیا جائے تو پاکستان کا حقیقی قرضہ 90 کھرب روپے بنتا ہے، نہ کہ 78 کھرب روپے۔ انہوں نے خبردار کیا کہ قرضوں کے ناقص اندراج اور غیر شفاف رپورٹنگ سے مالی خطرات میں اضافہ ہو رہا ہے۔ ان کے مطابق قرضہ نظم و نسق اور ایف آر ڈی ایل ایکٹ کا ازسرِ نو جائزہ لینا ناگزیر ہے تاکہ پاکستان مالیاتی پائیداری اور شفافیت کی طرف بڑھ سکے۔

کاپی رائٹ بزنس ریکارڈر، 2025