غزہ میں فضائی حملوں میں 26 فلسطینی شہید، اسرائیل کا جنگ بندی اور امداد کی بحالی کا اعلان

اسرائیلی فوج نے اتوار کو اعلان کیا کہ غزہ میں جنگ بندی دوبارہ نافذ کر دی گئی ہے، اس واقعے کے بعد جس میں دو اسرائیلی فوجی ہلاک ہوئے اور اسرائیل نے جوابی فضائی حملوں کی ایک نئی لہر شروع کی، جس میں فلسطینی حکام کے مطابق 26 افراد جاں بحق ہوئے۔ یہ واقعہ امریکی ثالثی میں ہونے والی رواں ماہ کی جنگ بندی کے لیے اب تک کا سب سے بڑا امتحان قرار دیا جا رہا ہے۔

امریکی صدر ڈونلڈ ٹرمپ نے کہا کہ ان کی ثالثی میں طے پانے والی جنگ بندی اب بھی برقرار ہے۔ ان کے مطابق امریکی حکام کا خیال ہے کہ حماس کی اعلیٰ قیادت ممکنہ طور پر خلاف ورزیوں میں براہِ راست ملوث نہیں، تاہم ان معاملات کو سخت مگر مناسب طریقے سے نمٹایا جائے گا۔

اسرائیلی فوج نے کہا کہ اس نے حماس کے متعدد اہداف کو نشانہ بنایا، جن میں کمانڈر، جنگجو، سرنگیں اور اسلحہ کے ذخائر شامل ہیں۔ ان حملوں میں خواتین اور بچوں سمیت 26 افراد جاں بحق ہوئے۔

اسرائیلی اقدام سے قبل غزہ کو جانے والی امداد روک دی گئی تھی، تاہم امریکی دباؤ کے بعد پیر سے امدادی سامان کی فراہمی دوبارہ شروع کرنے کا فیصلہ کیا گیا۔

ٹرمپ نے کہا کہ بعض حماس جنگجو شاید اپنی قیادت سے آزادانہ طور پر کارروائیاں کر رہے ہیں، جس کی وجہ سے صورتحال کشیدہ ہوئی۔

دوسری جانب، حماس کے عسکری ونگ نے جنگ بندی پر قائم رہنے کا اعلان کیا اور کہا کہ اسے رفح میں کسی جھڑپ کی اطلاع نہیں۔

امریکی نائب صدر جے ڈی وینس نے کہا کہ غزہ میں تقریباً 40 مختلف حماس سیل موجود ہیں، جن میں سے کچھ جنگ بندی کی پاسداری کریں گے، مگر دیگر نہیں۔

اسرائیلی وزیراعظم بینجمن نیتن یاہو نے کہا کہ حماس کی خلاف ورزیوں پر فوج کو سخت جواب دینے کا حکم دیا گیا ہے۔

رپورٹس کے مطابق غزہ میں عام شہری ممکنہ لڑائی کے خدشے پر گھروں سے نکلنے لگے ہیں جبکہ امدادی تنظیموں نے خبردار کیا ہے کہ مزید امداد کی فوری ضرورت ہے۔