ماری انرجیز نے پاکستان پیٹرولیم، ٹی پی او سی اور او جی ڈی سی کے ساتھ اسٹریٹجک شراکت داری قائم کرلی

ماری انرجیز نے بدھ کو اعلان کیا ہے کہ وہ پاکستان پیٹرولیم لمیٹڈ (پی پی ایل ) سے ایسٹرن آف شور انڈس-سی بلاک میں 20 فیصد ورکنگ انٹرسٹ حاصل کرنے پر متفق ہو گئی ہے، جس میں ترکش پیٹرولیم اوورسیز کمپنی (ٹی پی او سی )، جو ترکیہ کی قومی تیل کمپنی ترکیہ پیٹرولری انونیم اورٹاکلیگی (TPAO) کی مکمل ملکیتی ذیلی کمپنی ہے اور آئل اینڈ گیس ڈیولپمنٹ کمپنی لمیٹڈ (او جی ڈی سی) بھی شامل ہیں۔

پاکستان اسٹاک ایکسچینج (پی ایس ایکس) کو بھیجے گئے نوٹس کے مطابق یہ شراکت داری پاکستان اور ترکیہ کی حکومتوں کے اعلیٰ سطح رابطوں کا نتیجہ ہے جس کا مقصد توانائی شعبے میں دو طرفہ تعاون کو گہرا کرنا اور پاکستان کے کم دریافت شدہ آف شور بیسنز میں تیل و گیس کی تلاش کی سرگرمیوں کو شروع کرنے کے لیے غیر ملکی سرمایہ کاری کی حوصلہ افزائی کرنا ہے۔

کمپنی نے مزید کہا کہ لین دین کی تکمیل اور تمام مطلوبہ منظوریوں کے بعد، متوقع شراکت داری کے حصص یوں ہوں گے: ٹی پی او سی (آپریٹر) 25فیصد ، پاکستان پیٹرولیم لمیٹڈ 35فیصد، ماری انرجیز 20 فیصد اور آئل اینڈ گیس ڈیولپمنٹ کمپنی 20 فیصد۔

نوٹس میں مزید کہا گیا کہ ٹی پی او سی، پاکستان پیٹرولیم لمیٹڈ اور او جی ڈی سی کے ساتھ یہ تعاون پاکستان کی آف شور ہائیڈروکاربن صلاحیت کو اجاگر کرنے اور توانائی شعبے میں پاکستان اور ترکیہ کے درمیان طویل المدتی اسٹریٹجک شراکت داری کے لیے مضبوط بنیاد قائم کرنے کی جانب ایک اہم قدم ہے۔

مالی لحاظ سے ماری انرجیز نے مالی سال 2025 میں 65.4 ارب روپے منافع بعد از ٹیکس ریکارڈ کیا جو مالی سال 2024 کے 77.3 ارب روپے کے مقابلے میں کم ہے۔