دفتر خارجہ کا امن منصوبے پر حماس کے ردعمل کا خیرمقدم

پاکستان نے امریکی صدر ڈونلڈ ایچ ٹرمپ کے اعلان کردہ 20 نکاتی امن منصوبے پر حماس کے ردعمل کا خیرمقدم کیا ہے۔

دفتر خارجہ کے ترجمان نے ہفتے کے روز جاری کردہ بیان میں کہا کہ یہ ایک اہم موقع ہے کہ فوری جنگ بندی کو ممکن بنایا جائے، غزہ میں بے گناہ فلسطینیوں کے خون خرابے کا خاتمہ ہو، تمام یرغمالیوں اور فلسطینی قیدیوں کی رہائی عمل میں آئے، انسانی امداد کی بلا روک ٹوک فراہمی یقینی بنائی جائے، اور دیرپا امن کے لیے ایک قابلِ اعتبار سیاسی عمل کی راہ ہموار کی جائے۔ اسرائیل کو فوری طور پر حملے روکنے چاہئیں۔

ترجمان نے مزید کہا کہ پاکستان، غزہ میں امن کے لیے امریکی صدر ٹرمپ کی کوششوں کو سراہتا ہے اور امید کرتا ہے کہ ان اقدامات کے نتیجے میں ایک پائیدار جنگ بندی اور منصفانہ، جامع اور دیرپا امن ممکن ہو گا۔ پاکستان اس عمل میں تعمیری اور مؤثر کردار ادا کرتا رہے گا۔

دفتر خارجہ نے اپنے بیان میں اس عزم کا اعادہ کیا کہ پاکستان فلسطینی عوام کے منصفانہ موقف کی اصولی حمایت جاری رکھے گا اور ان کے حقِ خودارادیت کی جدوجہد میں مکمل یکجہتی کے ساتھ کھڑا ہے، جس کا مقصد 1967 سے قبل کی سرحدوں پر مبنی ایک خودمختار، قابلِ بقا اور متصل فلسطینی ریاست کا قیام ہے، جس کا دارالحکومت القدس الشریف ہو، جیسا کہ اقوام متحدہ کی متعلقہ قراردادوں اور بین الاقوامی قانونی اصولوں میں درج ہے۔

اس سے قبل امریکی صدر ٹرمپ نے اپنے سوشل میڈیا پلیٹ فارم ’ٹرتھ سوشل پر کہا کہ انہوں نے اسرائیل کو ہدایت دی ہے کہ وہ غزہ میں بمباری فوراً بند کرے کیونکہ حماس نے ان کے 20 نکاتی امن روڈ میپ کے تحت امن قائم رکھنے کی آمادگی ظاہر کی ہے۔

یہ اعلان اس وقت سامنے آیا جب حماس نے ٹرمپ کے امن منصوبے کے کچھ حصوں پر رضامندی ظاہر کی، جن میں تمام اسرائیلی قیدیوں کی رہائی بھی شامل ہے۔ جمعہ کے روز ٹرمپ نے حماس کو اتوار کی شام تک امن تجاویز قبول کرنے اور یرغمالیوں کو رہا کرنے کی ڈیڈ لائن دی تھی، بصورتِ دیگر سنگین نتائج کی تنبیہ کی تھی۔

کاپی رائٹ بزنس ریکارڈر، 2025