غزہ میں امدادی سامان کی ترسیل تیز کرنے کے لیے تیار ہیں ، اقوام متحدہ

اقوام متحدہ نے کہا ہے کہ غزہ پٹی کے حالات جیسے ہی بہتر ہوں گے اور سلامتی کی ضمانت میسر آجائے گی وہ امدادی سامان کی سپلائی بڑھانے کے لیے تیار ہے۔ یہ بیان امریکی صدر ڈونلڈ ٹرمپ کے فلسطینی علاقے کے لیے نئے امن منصوبے کے اعلان کے بعد سامنے آیا۔

گزشتہ ماہ اقوام متحدہ نے غزہ میں قحط کی صورتحال کا اعلان کرتے ہوئے الزام عائد کیا تھا کہ اسرائیل نے امدادی ترسیل میں منظم رکاوٹ ڈالی ہے۔

ٹرمپ کا 20 نکاتی منصوبہ، جو پیر کو پیش کیا گیا، کہتا ہے کہ غزہ میں فوری طور پر مکمل امداد بھیجی جائے گی اور یہ ترسیل اقوام متحدہ، اس کی ایجنسیوں اور ریڈ کریسنٹ کے ذریعے بغیر مداخلت کے بھیجی جائے گی۔ قطر نے بھی اعلان کیا ہے کہ حماس اور ترکیہ کے ساتھ اس منصوبے پر منگل کو اجلاس ہوگا۔

یو این اوچا کے ترجمان جینس لارکے نے واضح کیا کہ اقوام متحدہ منصوبے کی تیاری میں شامل نہیں تھی، تاہم ادارہ ہمیشہ تیار ہے۔ ان کے مطابق مختلف ایجنسیوں کے پاس امداد موجود ہے جو عطیہ دہندگان پہلے ہی فراہم کر چکے ہیں۔ جیسے ہی موقع ملا، یہ غزہ کے عوام تک پہنچا دی جائے گی۔

لارکے نے کہا کہ یو این کا عملہ ہمیشہ کی طرح ان لوگوں تک امداد پہنچانے کی کوشش کرے گا جنہیں اس کی سب سے زیادہ ضرورت ہے۔

اقوام متحدہ کی ترجمان الیسندرا ویلوچی نے کہا کہ یو این ہر قسم کی ثالثی کی کوششوں کا خیر مقدم کرتا ہے اور انسانی امداد کی فراہمی سمیت امن منصوبوں کی مکمل حمایت کے لیے تیار ہے ۔