ہانگ کانگ کو کامیاب برآمدات کے بعد بیکو اسٹیل کو 2 کروڑ 20 لاکھ ڈالر کے نئے آرڈرز کی توقع

بیکو اسٹیل لمیٹڈ نے ہانگ کانگ کو کاپر انگوٹس کی برآمدات کا پہلا آرڈر کامیابی سے مکمل کرنے کے بعد اعلان کیا ہے کہ وہ بین الاقوامی خریداروں سے اعلیٰ سطحی مذاکرات میں مصروف ہے اور آئندہ مالی سال میں تقریباً 2 کروڑ 20 لاکھ ڈالر کے نئے برآمدی معاہدے طے پانے کی توقع ہے۔

یہ انکشاف کمپنی نے جمعہ کو پاکستان اسٹاک ایکسچینج کو بھیجی گئی فائلنگ میں کیا۔

انتظامیہ کے مطابق متوقع آرڈرز کی حتمی تکمیل کمپنی کی مالی کارکردگی میں نمایاں بہتری لائے گی۔

اس اقدام سے نہ صرف مجموعی آمدنی اور منافع میں خاطر خواہ اضافہ ہوگا بلکہ موجودہ مالی سال کے مقابلے میں فروخت کے حجم میں بھی نمایاں وسعت متوقع ہے۔

کمپنی کا کہنا ہے کہ متوقع ترقی سے منافع بخشی مزید مستحکم ہوگی اور حصص یافتگان کے لیے زیادہ قدر پیدا ہوگی۔

مزید برآں ان برآمدات سے قیمتی زرمبادلہ حاصل ہوگا جو قومی معیشت پر مثبت اثر ڈالے گا۔

بیکو اسٹیل نے زور دیا کہ وہ اپنی اسٹریٹجک حکمتِ عملی پر گامزن ہے جس کے تحت برآمدی دائرہ کار کو وسعت دینا اور عالمی منڈیوں میں اپنی موجودگی کو متنوع بنانا شامل ہے۔

اس کے ساتھ ہی کمپنی قابلِ تجدید توانائی کی طرف بھی قدم بڑھا رہی ہے۔ رواں ماہ کے آغاز میں بیکو اسٹیل نے ایک توانائی فراہم کرنے والے ادارے کے ساتھ معاہدہ کیا ہے جس کے تحت لاہور کے بادامی باغ پلانٹ میں 2 میگاواٹ کا سولر پاور سسٹم نصب کیا جائے گا۔

واضح رہے کہ بیکو اسٹیل لمیٹڈ، جو ماضی میں روی ٹیکسٹائل ملز کے نام سے جانی جاتی تھی، پاکستان میں ایک پبلک لمیٹڈ کمپنی کے طور پر رجسٹرڈ ہے اور اس کی مصنوعات اسکریپ سے لے کر بلٹ اور خصوصی اسٹیل سمیت مختلف تیار شدہ مصنوعات پر مشتمل ہیں۔