صدر آصف علی زرداری نے پیر کے روز شنگھائی میں شنگھائی الیکٹرک کے چیئرمین وو لی سے ملاقات کی اور بعد ازاں کمپنی کی تنصیبات کا دورہ کیا۔
اس موقع پر خاتونِ اول بی بی آصفہ بھٹو زرداری، چیئرمین پاکستان پیپلز پارٹی بلاول بھٹو زرداری اور سینیٹر سلیم مانڈوی والا بھی ان کے ہمراہ تھے۔
شنگھائی الیکٹرک کے چیئرمین نے صدر کو پاکستان میں جاری کمپنی کے منصوبوں پر بریفنگ دی، جن میں تھر کول، جوہری توانائی اور کوئلے سے چلنے والے بجلی گھروں پر کام شامل ہے۔
صدر زرداری نے پاکستان کی توانائی ضروریات پوری کرنے، روزگار پیدا کرنے اور سماجی و معاشی ترقی میں شنگھائی الیکٹرک کے کردار پر شکریہ ادا کیا۔ انہوں نے تھر کول منصوبے کی اہمیت پر زور دیا، بالخصوص کوئلے کی گیس کاری کے امکانات کو اجاگر کیا اور شنگھائی الیکٹرک کو پاکستان کے ٹرانسمیشن اور ڈسٹری بیوشن نیٹ ورک کی جدید کاری میں مزید سرمایہ کاری کی دعوت دی۔
صدر زرداری نے یقین دلایا کہ کسی بھی زیرِ التوا مسئلے کو باہمی تعاون کے جذبے کے تحت خوش اسلوبی سے حل کیا جائے گا۔ کمپنی کے سی ای او نے پاکستان میں کام کرنے والے اپنے ملازمین کے لیے فراہم کردہ سکیورٹی اقدامات پر حکومتِ پاکستان کا شکریہ ادا کیا۔
صدر زرداری نے بھی اس عزم کا اعادہ کیا کہ پاکستان میں چینی کارکنوں کے لیے محفوظ اور سازگار ماحول کو یقینی بنانے کے لیے حفاظتی اقدامات مزید بڑھائے جائیں گے۔
دورے کے دوران صدر کو شنگھائی الیکٹرک کی تاریخ اور کارکردگی پر بھی بریفنگ دی گئی۔ یہ کمپنی 1902 میں قائم ہوئی تھی اور آج چین کی نمایاں سازوسامان تیار کرنے والی کمپنیوں میں شمار ہوتی ہے، جو توانائی، بجلی اور صنعتی نظام میں اپنی جدت کے باعث عالمی شہرت رکھتی ہے۔
صدر زرداری نے تھر، سندھ میں کوئلے کی گیس کاری کے ایک پلانٹ کے قیام کے لیے مفاہمتی یادداشت (ایم او یو) پر دستخطوں کی تقریب میں بھی شرکت کی۔
یہ ایم او یو ایم ایف ٹی سی کول گیسفیکیشن اینڈ مینو فیکچرنگ (پرائیویٹ) لمیٹڈ کے سی ای او شاہد تواوالا اور سینو سندھ ریسورسز (پرائیویٹ) لمیٹڈ/ شنگھائی الیکٹرک کے سی ای او لن جیگن کے درمیان طے پایا۔
یہ تھر کول پر مبنی پہلا کوئلہ گیس کاری اور کھاد کا منصوبہ ہے، جو نہ صرف ملک کی توانائی ضروریات پوری کرے گا بلکہ زرعی شعبے کی معاونت میں بھی اہم کردار ادا کرے گا۔
تقریب میں وزیر اطلاعات و ٹرانسپورٹ شرجیل میمن، وزیر برائے منصوبہ بندی و ترقی و توانائی سید ناصر شاہ، چین کے سفیر جیانگ ژائی ڈونگ اور پاکستان کے سفیر خالد ہاشمی بھی موجود تھے۔
Comments
Comments are closed.