ڈریپ سے منظوری: سرل کمپنی پاکستان میں ڈینوسومیب انجیکشنز لانچ کرنے کو تیار

دی سرل کمپنی لمیٹڈ کو ڈرگ ریگولیٹری اتھارٹی آف پاکستان (ڈریپ) سے ڈینوسومیب انجیکشنز کی مارکیٹنگ اور فروخت کی منظوری مل گئی ہے۔ یہ ایک بایوسمیولر دوا ہے جو آسٹیوپوروسس اور کینسر کے علاج میں استعمال ہوتی ہے اور کمپنی کے دواسازی کے پورٹ فولیو میں ایک اہم اضافہ قرار دی جا رہی ہے۔

کمپنی نے پیرکو پاکستان اسٹاک ایکسچینج (پی ایس ایکس) کو نوٹس کے ذریعے اس پیش رفت سے آگاہ کیا۔

نوٹس میں بتایا گیا کہ کمپنی نے ڈریپ سے ڈینوسومیب انجیکشنز 120 ملی گرام اور 60 ملی گرام (بایوسمیولر ادویات) کی کامیاب رجسٹریشن حاصل کرلی ہے۔

پاکستان میں پروڈکٹ رجسٹریشن ہولڈر کے طور پر سرل کو چین کی ماب ویل فارماسیوٹیکلز کے ساتھ لائسنس معاہدے کے تحت ان ادویات کی مارکیٹنگ اور فروخت کے حقوق حاصل ہوگئے ہیں۔

فارماسیوٹیکل کمپنی کے مطابق ڈینوسومیب ایک مونوکلونل اینٹی باڈی ہے، جو آسٹیوپوروسس (60 ملی گرام) اور کینسر کے علاج (120 ملی گرام) میں استعمال ہوگی۔

نوٹس میں مزید کہا گیا کہ کمپنی اب پاکستان میں ڈینوسومیب انجیکشنز کی کمرشل لانچ کی تیاری کر رہی ہے، جو پروڈکٹ پورٹ فولیو میں توسیع کے لیے ایک اہم سنگِ میل ہے۔

کمپنی کے مطابق یہ پیش رفت مصنوعات کے معیار میں بہتری، کاروبار کے استحکام اور حصص یافتگان کے لیے زیادہ قدر پیدا کرنے کے عزم کی عکاسی کرتی ہے۔

سرل کو 1965 میں پاکستان میں ایک پرائیویٹ لمیٹڈ کمپنی کے طور پر شامل کیا گیا تھا اور بعد میں اسے پبلک لمیٹڈ کمپنی میں تبدیل کردیا گیا۔ کمپنی کی بنیادی سرگرمیاں دواسازی، کنزیومر ہیلتھ اور غذائی مصنوعات کی تیاری و فروخت پر مشتمل ہیں۔ یہ کمپنی انٹرنیشنل برانڈز (پرائیویٹ) لمیٹڈ کی ذیلی کمپنی ہے، جو سرل کے 50.25 فیصد شیئرز کی مالک ہے۔

اس سے قبل جولائی میں سرل نے طاہر احمد کو چیف ایگزیکٹو آفیسر تعینات کرنے کا اعلان کیا تھا۔