ای سی سی نے اسٹیل ملز کی زمین پر صنعتی اسٹیٹ کے قیام کی منظوری دے دی

اقتصادی رابطہ کمیٹی (ای سی سی) نے بدھ کو کئی معاشی اقدامات کی منظوری دی، جن میں پاکستان اسٹیل ملز (پی ایس ایم) کی زمین پر صنعتی اسٹیٹ کا قیام، چمڑے کی برآمدات میں سہولت اور ماحولیاتی و میڈیا اپ گریڈیشن کے لیے بڑے فنڈز شامل ہیں۔

وزیر خزانہ و محصولات محمد اورنگزیب کی زیر صدارت بدھ کو ہونے والے اجلاس میں اہم معاشی اور ترقیاتی امور پر غور کیا گیا۔

ایک اہم فیصلے کے تحت ای سی سی نے کراچی میں پی ایس ایم کی زمین پر صنعتی اسٹیٹ کے قیام کی منظوری دی، جس کا مقصد صنعتی سرگرمیوں کو فروغ دینا، روزگار کے مواقع پیدا کرنا اور سرمایہ کاری کو راغب کرنا ہے۔

ای سی سی نے چمڑے کی درآمد و برآمد پر ہیلتھ قرنطینہ سرٹیفکیٹ کی شرط ختم کرنے کی منظوری بھی دی، تاکہ چمڑے کی صنعت کو سہولت فراہم کی جا سکے اور عالمی منڈی میں اس کی مسابقت بہتر ہو۔

کمیٹی نے وزارت ماحولیاتی تبدیلی و ماحولیاتی ہم آہنگی کے لیے مالی سال 26-2025 میں ایک تکنیکی ضمنی گرانٹ (ٹی ایس جی) کی منظوری دی، تاکہ وزارت ماحولیاتی تحفظ اور موسمیاتی لچک کے اقدامات کو مضبوط بنا سکے، خصوصاً اس سال برازیل میں ہونے والے کانفرنس آف پارٹیز (کوپ-30) کے 30ویں اجلاس میں شرکت کے ذریعے ایسا کیا گیا۔

مزید برآں، ای سی سی نے پاکستان ٹیلی وژن کارپوریشن (پی ٹی وی سی) کے حق میں 2 ارب 82 کروڑ 90 لاکھ روپے کی تکنیکی ضمنی گرانٹ کی منظوری دی، تاکہ اس کے انگلش نیوز چینل کو اپ گریڈ کیا جا سکے، نشریاتی معیار بہتر بنایا جا سکے اور عالمی ناظرین تک رسائی بڑھائی جا سکے۔ کمیٹی نے وزارت پر زور دیا کہ چینل کو خود کفیل اور مالی طور پر پائیدار بنانے کے لیے جامع بزنس پلان تیار کرے، تاکہ مستقبل میں وفاقی گرانٹس پر انحصار کم ہو۔

وزیر خزانہ نے ان فیصلوں پر بروقت اور مؤثر عمل درآمد کی اہمیت پر زور دیا، تاکہ ان کے مطلوبہ معاشی اور سماجی فوائد حاصل کیے جا سکیں۔

کاپی رائٹ بزنس ریکارڈر، 2025