وزیر خزانہ سے ترکمانستان کے سفیر کی ملاقات، تجارتی و توانائی تعلقات کو مضبوط بنانے کا عزم

ترکمانستان نے پاکستان کو اپنے انویسٹمنٹ فورم (ٹی آئی ایف) میں شرکت کی دعوت دی ہے، جو آئندہ ماہ اشک آباد میں منعقد ہوگا۔ یہ پیشرفت اس وقت ہوئی جب پاکستان اور ترکمانستان نے تجارت، توانائی اور انفراسٹرکچر کے شعبوں میں گہرے تعاون کے امکانات پر غور کیا۔ یہ ملاقات وفاقی وزیر خزانہ محمد اورنگزیب اور ترکمانستان کے سفیر اتاجان موولاموف کے درمیان پیر کو ہوئی۔

وزارت خزانہ کی جانب سے جاری بیان کے مطابق ملاقات میں باہمی دلچسپی کے امور پر تبادلہ خیال کیا گیا، خاص طور پر دو طرفہ تجارت، کاروبار اور سرمایہ کاری کو فروغ دینے پر توجہ مرکوز رہی۔

محمد اورنگزیب نے برادر ملک ترکمانستان کے ساتھ تعلقات کو مزید گہرا کرنے کے لیے پاکستان کے پختہ عزم کا اعادہ کیا اور بتایا کہ گزشتہ برس کے دوران دونوں ممالک کے درمیان کئی اعلیٰ سطح وزارتی دورے ہو چکے ہیں۔

اس موقع پراتاجان موولاموف نے پاکستان کے ساتھ شراکت داری کو ترکمانستان کی جانب سے انتہائی اہمیت کا حامل قرار دیتے ہوئے کہا کہ پاکستان نہ صرف ایک اہم تجارتی و سرمایہ کاری کا شراکت دار ہے بلکہ دو طرفہ اور بین الاقوامی تجارت کے لیے ایک کلیدی ٹرانزٹ حب بھی ہے۔

بیان کے مطابق فریقین نے مشترکہ منصوبوں اور تعاون کے مواقع پر بھی تبادلہ خیال کیا، خاص طور پر توانائی، ٹرانسپورٹیشن اور تعمیرات کے شعبوں میں۔

ترکمانستان کے وزیر خزانہ و معیشت مامیت گُلی آستاناگُلوف کی جانب سے، سفیر اتاجان موولاموف نے محمد اورنگزیب کو وسط ستمبر میں اشک آباد میں ہونے والے ٹی آئی ایف میں شرکت کی باضابطہ دعوت دی۔