پاکستان امریکا سے سب سے مضبوط تعلقات چاہتا ہے، اسحاق ڈار

ڈپٹی وزیراعظم و وزیرِ خارجہ اسحاق ڈار نے اتوار کو نیویارک میں پاکستانی کمیونٹی سے خطاب میں کہا کہ اسلام آباد امریکا کے ساتھ ’’سب سے مضبوط تعلقات‘‘ قائم کرنا چاہتا ہے، باوجود اس کے کہ چین کے ساتھ اس کی شراکت داری ’’آہنی‘‘ نوعیت کی ہے۔

انہوں نے کہا کہ پاکستان اب عالمی سطح پر تنہائی کا شکار نہیں بلکہ کئی ممالک سے قریبی تعلقات رکھتا ہے، جس کا ثبوت حالیہ اعلیٰ سطح ملاقاتیں ہیں جو چین، امریکا اور دیگر ممالک کے ساتھ اقتصادی و اسٹرٹیجک روابط پر مرکوز تھیں۔ اسحاق ڈار نے واضح کیا کہ امریکا اور چین کے ساتھ تعلقات کو ایک دوسرے کے تناظر میں نہیں دیکھا جانا چاہیے۔

انہوں نے کہا کہ سابق حکومت کے دور میں واشنگٹن کو یہ مؤقف بتایا گیا تھا لیکن جو بائیڈن انتظامیہ نے تعلقات میں دلچسپی نہیں لی، مجھے خوشی ہے کہ ٹرمپ انتظامیہ نے ہمارے ساتھ فعال روابط قائم کیے ہیں۔اسحاق ڈار نے بتایا کہ امریکی وزیر خارجہ مارکو روبیو سے ان کی ملاقات خوشگوار ماحول میں ہوئی اور عالمی و علاقائی امور پر بات چیت ہوئی۔

اسحاق ڈار نے پاکستان کی معیشت کی بہتری پر اطمینان ظاہر کرتے ہوئے کہا کہ افراطِ زر 40 فیصد سے کم ہو کر جنوری 2025 میں 2.4 فیصد تک آگیا ہے، آئی ایم ایف پروگرام مکمل ہوا اور سرمایہ کاروں کا اعتماد بحال ہوا ہے، جو پاکستان کے جی-20 معیشتوں میں شامل ہونے کی خواہش کو تقویت دیتا ہے۔

انہوں نے کمیونٹی کو خصوصی سرمایہ کاری سہولت کونسل (ایس آئی ایف سی) کے اقدامات سے آگاہ کیا اور بتایا کہ امریکا کیلئے پی آئی اے کی پروازیں بحال کرنے پر کام جاری ہے۔ اسحاق ڈار نے پاکستانی نژاد امریکیوں کے کردار کو سراہا اور کہا کہ پاکستان کی اقوام متحدہ کی سلامتی کونسل کی موجودہ صدارت اور 182 ممالک کی حمایت اس کی مؤثر سفارتکاری کا ثبوت ہے۔

انہوں نے افغانستان کے ساتھ تجارتی و ریل روابط بڑھانے اور دہشتگردی روکنے کی یقین دہانیوں کا ذکر کرتے ہوئے عافیہ صدیقی کی رہائی کیلئے کوششیں جاری رکھنے کا اعادہ کیا۔