امریکا-یورپی یونین تجارتی معاہدے سے تیل کی قیمتوں میں اضافہ

تیل کی قیمتیں پیر کو معمولی اضافے کے ساتھ بڑھ گئیں کیونکہ امریکا اور یورپی یونین کے درمیان تجارتی معاہدے اور چین کے ساتھ ٹیرف میں وقفہ بڑھانے کے امکان نے ان خدشات کو کم کر دیا کہ بلند ٹیرف معاشی سرگرمیوں کو محدود کر کے ایندھن کی طلب پر منفی اثر ڈال سکتے ہیں۔

برینٹ کروڈ کے اکتوبر فیوچرز 22 سینٹ یا 0.32 فیصد بڑھ کر 68.66 ڈالر فی بیرل اور امریکی ویسٹ ٹیکساس انٹرمیڈیٹ (ڈبلیو ٹی آئی) 22 سینٹ یا 0.34 فیصد اضافے کے ساتھ 65.38 ڈالر فی بیرل پر آ گئے۔

آئی جی مارکیٹس کے تجزیہ کار ٹونی سائی کامور کے مطابق امریکا-یورپی یونین معاہدہ اور امریکا-چین ٹیرف ٹروس کی ممکنہ توسیع عالمی مالیاتی منڈیوں اور تیل کی قیمتوں کی مدد کر رہی ہے۔

امریکا اور یورپی یونین نے اتوار کو ایک فریم ورک تجارتی معاہدہ کیا جس کے تحت زیادہ تر یورپی مصنوعات پر 15 فیصد درآمدی ٹیرف عائد ہو گا، جو پہلے کی متوقع شرح سے نصف ہے، اور ایک بڑی تجارتی جنگ ٹل گئی۔

اس دوران امریکی اور چینی مذاکرات کار پیر کو اسٹاک ہوم میں ملاقات کریں گے تاکہ 12 اگست کی ڈیڈ لائن سے قبل بلند ٹیرف کو روکنے کے لیے عارضی معاہدے میں توسیع کی جا سکے۔

جمعہ کو تیل کی قیمتیں تین ہفتوں کی کم ترین سطح پر بند ہوئیں کیونکہ عالمی تجارتی خدشات اور وینزویلا سے سپلائی میں اضافے کی توقعات منڈی پر حاوی رہیں۔ وینزویلا کی سرکاری کمپنی پی ڈی وی ایس اے اپنے جوائنٹ وینچرز پر کام دوبارہ شروع کرنے کی تیاری کر رہی ہے کیونکہ صدر ڈونلڈ ٹرمپ کی جانب سے برآمدات کی اجازت دوبارہ دیے جانے کی امید ہے۔

اوپیک پلس کی جانب سے پیداوار میں مزید کمی کو محدود کرنے کا امکان قیمتوں میں اضافے کو محدود کر رہا ہے۔ اوپیک پلس کے مانیٹرنگ پینل کا اجلاس پیر کو 1200 جی ایم ٹی پر ہو گا، جو اگست میں یومیہ 5.48 لاکھ بیرل اضافے کے منصوبے میں تبدیلی کا امکان نہیں رکھتا۔

ادھر یمن کے حوثیوں نے اتوار کو خبردار کیا کہ وہ غزہ تنازع پر اسرائیل مخالف کارروائیوں کے تحت کسی بھی ایسی کمپنی کے جہازوں کو نشانہ بنائیں گے جو اسرائیلی بندرگاہوں کے ساتھ کاروبار کرتی ہیں۔