پی آئی اے کی نجکاری:ابھی کوئی حتمی معاہدہ نہیں ہوا، لکی سیمنٹ

لکی سیمنٹ لمیٹڈ، جو پاکستان کے بڑے کاروباری گروپوں میں سے ایک ہے، نے وضاحت کی ہے کہ اس نے پاکستان انٹرنیشنل ایئرلائنز (پی آئی اے سی ایل) کے حصول کے لیے کسی قسم کی حتمی یا لازمی معاہدہ بندی نہیں کی، اگرچہ یہ کمپنی ایک ایسے کنسورشیم کا حصہ ہے جسے ایئرلائن میں 51 فیصد سے 100 فیصد حصص کی ممکنہ خریداری کے لیے جانچ پڑتال (ڈیو ڈیلیجنس) کرنے کے لیے شارٹ لسٹ کیا گیا ہے۔

بدھ کے روز پاکستان اسٹاک ایکسچینج (پی ایس ایکس) کو بھیجے گئے ایک نوٹس میں لکی سیمنٹ نے کہا کہ کسی بھی طرح کی حتمی پیش رفت کا انحصار جانچ پڑتال کے نتائج اور درکار منظوریوں پر ہو گا۔

نوٹس کے مطابق لکی سیمنٹ لمیٹڈ نے دیگر نمایاں کارپوریٹ اداروں — ہب پاور ہولڈنگز لمیٹڈ، کوہاٹ سیمنٹ کمپنی لمیٹڈ، اور میٹرو وینچرز (پرائیویٹ) لمیٹڈ — کے ساتھ مل کر ایک کنسورشیم تشکیل دیا اور پاکستان انٹرنیشنل ایئرلائنز کارپوریشن لمیٹڈ (پی آئی اے سی ایل) میں 51 فیصد سے 100 فیصد تک حصص کے حصول اور انتظامی کنٹرول کے لیے اظہار دلچسپی اور قابلیت کا بیان جمع کروایا، جسے حکومتِ پاکستان نجکاری کے عمل کے تحت فروخت کے لیے پیش کر رہی ہے۔

لکی سیمنٹ نے مزید بتایا کہ اس کنسورشیم کو، دیگر دلچسپی رکھنے والے فریقین کے ساتھ، نجکاری کمیشن کی جانب سے قبل از منظوری مل گئی ہے تاکہ وہ پی آئی اے سی ایل پر مالی، تکنیکی اور قانونی جانچ پڑتال کر سکے۔

حکومت نے منگل کے روز اعلان کیا تھا کہ پی آئی اے میں حصص کے لیے بولی دینے کے لیے چار فریقین کو منظوری دے دی گئی ہے۔

ان میں سے ایک کنسورشیم لکی سیمنٹ، ہب پاور ہولڈنگز، کوہاٹ سیمنٹ، اور میٹرو وینچرز پر مشتمل ہے۔

ایک اور کنسورشیم عارف حبیب کارپوریشن کی قیادت میں ہے، جس میں فاطمہ فرٹیلائزر، دی سٹی اسکول، اور لیک سٹی ہولڈنگز شامل ہیں۔

اس کے علاوہ، فوجی فرٹیلائزر کمپنی اور نجی ایئرلائن ایئر بلیو کو بھی بولی دینے کی اجازت دی گئی ہے۔

حکومت پی آئی اے کے حصص مسابقتی بولی کے ذریعے فروخت کرنے کا منصوبہ رکھتی ہے۔

لکی سیمنٹ نے واضح کیا کہ نہ تو کمپنی اور نہ ہی کنسورشیم نے فی الوقت کسی بھی فریق کے ساتھ پی آئی اے سی ایل کے حصص کے حصول کے لیے کوئی حتمی معاہدہ کیا ہے۔

کسی بھی طرح کی حتمی معاہدہ بندی صرف اُس صورت میں کی جائے گی جب جانچ پڑتال مکمل طور پر اطمینان بخش ہو، تمام متعلقہ کارپوریٹ اور ریگولیٹری منظوریوں کا حصول ممکن ہو، اور لین دین تجارتی طور پر موزوں ہو۔

کمپنی نے مزید کہا کہ اس مرحلے پر، کنسورشیم کے ذریعے، صرف ایک جامع جانچ پڑتال کرنے اور اس ممکنہ حصول کے مواقع کی تجارتی قابلیت کا جائزہ لینے کا ارادہ ہے۔

واضح رہے کہ پاکستان حکومت، آئی ایم ایف کے 7 ارب ڈالر کے پروگرام کے تحت مالی اصلاحات اور خسارے میں چلنے والے سرکاری اداروں کی نجکاری کے لیے پی آئی اے میں 51 تا 100 فیصد حصص کی فروخت کی کوشش کر رہی ہے۔