ملک بھر میں یکساں ٹیرف، حکومت نے نیپرا کو باضابطہ درخواست دیدی

وفاقی حکومت نے نیشنل الیکٹرک پاور ریگولیٹری اتھارٹی (نیپرا) سے باضابطہ طور پر درخواست کی ہے کہ یکم جولائی 2025 سے پورے ملک بشمول کراچی میں بجلی کا یکساں ٹیرف نافذ کیا جائے۔ اس اقدام میں مالی سال 26-2025 کے لیے مختص سبسڈیز بھی شامل ہیں۔

وفاقی حکومت نے بجلی کے شعبے کے لیے سبسڈی میں 13 فیصد کمی کی ہے، جو مالی سال 25-2024 کے لیے 1.190 کھرب روپے تھی، جبکہ مالی سال 26-2025 کے لیے اسے 1.036 کھرب روپے مقرر کیا گیا ہے۔

پاور ڈویژن نے اپنی درخواست میں 23 جون 2025 کو نیپرا کی جانب سے تقسیم کار کمپنیوں (ڈسکوز) کے لیے جاری کردہ ٹیرف کا حوالہ دیا ہے، جس کے مطابق مالی سال 26-2025 کے لیے قومی اوسط ٹیرف 34 روپے فی یونٹ مقرر کیا گیا ہے، جو گزشتہ مالی سال کے 35.50 روپے فی یونٹ سے کم ہے۔

وفاقی حکومت کی اس درخواست میں قومی بجلی پالیسی 2021 کا بھی حوالہ دیا گیا ہے، جسے مشترکہ مفادات کونسل (سی سی آئی) نے منظور کیا تھا۔ اس پالیسی کی شق 5.6.1 میں کہا گیا ہے کہ بجلی کے شعبے کی مالی خودمختاری اس وقت ممکن ہے جب سروس کی مکمل لاگت کی وصولی مؤثر ٹیرف ڈھانچے کے ذریعے کی جائے۔ شق 5.6.4 کے مطابق، مالی خود انحصاری کا مقصد حکومتی سبسڈی کی ضرورت ختم کرنا ہے، سوائے مخصوص ہدفی امداد کے جو لائف لائن، صنعتی یا زرعی صارفین کے لیے ہو۔

پاور ڈویژن کا کہنا ہے کہ سماجی و معاشی اہداف، بجٹ تخمینوں اور نیپرا کی جانب سے سرکاری ڈسکوز کے لیے صارفین کے آخر تک ٹیرف کی سفارشات کو مدنظر رکھتے ہوئے حکومت ملک بھر میں تمام صارفین اور علاقوں کے لیے یکساں ٹیرف کا اطلاق جاری رکھنا چاہتی ہے۔ اس مقصد کے لیے نیپرا سے درخواست کی گئی ہے کہ وہ سرکاری ڈسکوز کے لیے سہ ماہی ایڈجسٹمنٹ سمیت یکساں ٹیرف کا تعین کرے۔

نیپرا ایکٹ کی شق 31(4) کے تحت اتھارٹی کو اختیار حاصل ہے کہ وہ عوامی شعبے کے لائسنس یافتگان کے لیے ان کے مشترکہ مالیاتی گوشواروں کی بنیاد پر یکساں ٹیرف مقرر کرے، تاکہ صارفین کے مفاد کا تحفظ یقینی بنایا جا سکے۔ اس شق کے تحت نیپرا نے ماضی میں اہدافی سبسڈیز اور کراس سبسڈیز کے اثرات کو یکساں ٹیرف میں شامل کیا ہے۔ حالیہ یکساں ٹیرف 13 جولائی 2024 کو طے کیا گیا تھا اور 14 جولائی 2024 کو نوٹیفائی کیا گیا تھا۔

نیپرا کی 23 جون 2025 کو تمام صارفین کیٹیگریز کے لیے تجویز کردہ ٹیرف شیڈولز کا جائزہ لینے کے بعد وفاقی حکومت نے فیصلہ کیا ہے کہ نیپرا ایکٹ کی شق 31(4) کے تحت یکساں ٹیرف نافذ کیا جائے۔

یہ تجویز حکومت کی اقتصادی اور سماجی پالیسی کی عکاسی کرتی ہے اور وفاقی حکومت کے زیرِ کنٹرول ڈسکوز کے منظور شدہ مشترکہ ریونیو تقاضوں پر مبنی ہے۔ یہ تجویز 28 جون 2025 کو کابینہ کی منظوری کے لیے پیش کی گئی اور منظوری کی توقع پر نیپرا کو ارسال کی جا رہی ہے۔

پاور ڈویژن نے واضح کیا کہ ڈسکوز کے درمیان ٹیرف کی عقلی تقسیم کا مقصد وفاقی محصولات میں اضافہ نہیں بلکہ آئینی اور پالیسی تقاضوں کے مطابق ڈسکوز کی ریونیو ضروریات کو پورا کرنا ہے۔ منظوری کے بعد نیپرا شق 31(7) کے تحت نیا یکساں ٹیرف جاری کرے گا، جو 14 جولائی 2024 کو نافذ شدہ موجودہ ٹیرف کی جگہ لے گا۔

حکومت کا یہ بھی ارادہ ہے کہ مستقبل میں کسی ممکنہ نجکاری کے بعد بھی کے-الیکٹرک کے لیے صارفین کی سطح پر ٹیرف کو سرکاری ڈسکوز کے برابر برقرار رکھا جائے۔ یہ مقصد براہِ راست اور بالواسطہ سبسڈیز کے ذریعے حاصل کیا جائے گا۔ اس کے لیے کے-الیکٹرک کے متغیر چارج میں نیپرا کی جانب سے کے-الیکٹرک کے ریونیو تقاضوں اور تجویز کردہ سبسڈیز کو مدنظر رکھتے ہوئے رد و بدل کیا جائے گا۔ یہ تجویز بھی کابینہ کی منظوری کے لیے پیش کی گئی ہے اور نیپرا کو ارسال کی جا رہی ہے۔

آخر میں پاور ڈویژن نے واضح کیا کہ یہ درخواست نیپرا ایکٹ کی شق 7 اور 31 اور نیپرا رولز کے قاعدہ 17 کے تحت دائر کی گئی ہے تاکہ ڈسکوز کے لیے سبسڈیز اور ٹیرف کی عقلی تقسیم کو مدنظر رکھتے ہوئے نیا یکساں ٹیرف شیڈول جاری کیا جا سکے۔

اسی نوعیت کی ایک علیحدہ درخواست کے-الیکٹرک کے لیے بھی شق 7، 31(4) اور 31(7) کے تحت دائر کی گئی ہے، تاکہ متغیر چارج میں ترمیم کی جا سکے اور صارفین کے لیے قومی سطح پر ٹیرف میں یکسانیت برقرار رکھی جا سکے۔

نیپرا یکم جولائی 2025 کو اس درخواست پر عوامی سماعت کرے گا، تاکہ ملک بھر بشمول کے-الیکٹرک کے دائرہ کار میں یکساں ٹیرف کے نفاذ کی باضابطہ منظوری دی جا سکے۔

کاپی رائٹ بزنس ریکارڈر، 2025