پی آئی اے نجکاری: فریقین کی نااہلی خالصتاً طریقہ کار کی بنیاد پر ہوئی، کمیشن

نجکاری کمیشن نے 19 جون 2025 کو اُن تمام دلچسپی رکھنے والے فریقین کی فہرست جاری کردی جنہوں نے مقررہ طریقہ کار کے تحت اظہارِ دلچسپی (ای او آئز) اور اہلیت کی دستاویزات (ایس او کیوز) جمع کروائیں۔

فہرست میں ایک کنسورشیم شامل ہے جس میں دو غیر ملکی ادارے بھی شریک ہیں جو اس عمل میں بین الاقوامی سرمایہ کاروں کی شمولیت کو واضح طور پر ظاہر کرتا ہے۔

تین فریقین نے 19 جون 2025 کی مقررہ تاریخ تک اپنے اسٹیٹمنٹس آف کوالیفکیشن جمع نہیں کروائیں جس کے باعث وہ طے شدہ معیار کے تحت خود بخود نااہل قرار پائے۔ ان کی نااہلی خالصتاً طریقہ کار کے مطابق اور خودکار تھی، جس میں نجکاری کمیشن نے کوئی کردار یا صوابدیدی اختیار استعمال نہیں کیا۔

مزید برآں اگرچہ پی آئی اے سی ایل کے ملازمین کے ایک گروپ نے ای میل کے ذریعے دلچسپی کا اظہار کیا لیکن وہ باضابطہ طور پر اظہارِ دلچسپی جمع کرانے کی شرائط پوری نہ کرسکے۔

ای او آئی جمع کرانے کے لیے دی گئی مہلت کے باوجود انہوں نے باضابطہ طریقہ کار کے تحت حصہ نہیں لیا لہٰذا انہیں اس عمل کا حصہ نہیں سمجھا جا سکتا۔

نجکاری کمیشن قومی مفاد میں شفاف، مسابقتی اور قواعد پر مبنی نجکاری کے عمل کے انعقاد کے لیے پرعزم ہے۔

اس طرح کی گمراہ کن رپورٹس نہ صرف عوام کو غلط معلومات فراہم کرتی ہیں بلکہ سرمایہ کاروں کے اعتماد کو بھی نقصان پہنچاتی ہیں۔

کاپی رائٹ: بزنس ریکارڈر، 2025