لاہور چیمبر کا معدنی وسائل سے بھرپور فائدہ اٹھانے کے لیے ویلیو ایڈیشن پر زور
- معدنی شعبے کی مکمل ویلیو چین کی ترقی سے صنعتی سرگرمیوں، غیر ملکی سرمایہ کاری اور برآمدات میں اضافہ ممکن ہے, علی اصغر
لاہور چیمبر آف کامرس اینڈ انڈسٹری (ایل سی سی آئی) کے صدر علی حسام اصغر نے پاکستان کے معدنی وسائل سے بھرپور فائدہ اٹھانے کے لیے خام مال کی برآمد کے بجائے مقامی سطح پر پراسیسنگ اور ویلیو ایڈیشن کو فروغ دینے پر زور دیا ہے۔
جاری بیان میں انہوں نے کہا کہ معدنی شعبے کی مکمل ویلیو چین کی ترقی سے صنعتی سرگرمیوں، غیر ملکی سرمایہ کاری اور برآمدات میں اضافہ ممکن ہے۔
انہوں نے وزیراعظم شہباز شریف کے پاکستان کو 2050 تک بڑی عالمی معیشت بنانے کے وژن کا خیرمقدم کرتے ہوئے کہا کہ ملک کے وسیع معدنی ذخائر معاشی ترقی کے بہترین مواقع فراہم کرتے ہیں۔
ان کے مطابق مقامی ریفائنریز، پراسیسنگ پلانٹس اور صنعتی یونٹس کے قیام سے روزگار بڑھے گا، درآمدات پر انحصار کم اور برآمدی آمدنی میں اضافہ ہوگا۔
انہوں نے ریکوڈک منصوبے کو معاون صنعتوں اور سرمایہ کاری کے فروغ کے لیے اہم قرار دیا۔
علی حسام اصغر نے حکومت پر زور دیا کہ سرمایہ کار دوست پالیسیاں، ٹیکس مراعات اور سرکاری و نجی شراکت داری کو فروغ دیا جائے۔ انہوں نے جدید کان کنی، ماحولیاتی تحفظ اور معدنی علاقوں کے عوام کو ترقی کے ثمرات پہنچانے کی ضرورت پر بھی زور دیا۔