مارکو روبیو کا مغربی کنارے میں آبادکاروں کے تشدد کے خلاف اسرائیل سے سخت کارروائی کا مطالبہ

امریکی وزیر خارجہ مارکو روبیو نے ہفتے کو کہا کہ امریکا چاہتا ہے کہ اسرائیل مقبوضہ مغربی کنارے میں آبادکاروں کے حملوں کی روک تھام کے لیے مزید اقدامات کرے۔

مارکو روبیو نے کہا کہ ہم ان تصاویر اور جو کچھ دیکھ رہے ہیں، اس پر شدید تشویش میں مبتلا ہیں۔ ہم نے اسرائیلی حکام سے ایسے واقعات کے خلاف سخت کارروائی کرنے کا مطالبہ کیا ہے اور اب بھی یہ مطالبہ کر رہے ہیں۔

ان کا یہ بیان ایسے وقت میں سامنے آیا ہے جب واشنگٹن پوسٹ کی امریکی فوٹو جرنلسٹ ہیڈی لیون کو متعدد افراد کی جانب سے تشدد کا نشانہ بنانے کی ویڈیو بڑے پیمانے پر پھیل گئی۔ یہ واقعہ جمعے کو پیش آیا، جب اسرائیلی آبادکاروں نے فلسطینی شہریوں پر حملے کیے۔ اس واقعے میں لیون سمیت کم از کم دو افراد زخمی ہوئے۔

بیلجیئم کے وزیر خارجہ نے بتایا کہ مقبوضہ مغربی کنارے میں یورپی سفارت کاروں اور فرانس کے ایک میئر کو بھی حملوں کا نشانہ بنایا گیا۔

مارکو روبیو نے کہا کہ امریکی محکمہ خارجہ نے اس واقعے کے بارے میں معلومات طلب کی ہیں، جس میں ہیڈی لیون پر حملہ بھی شامل ہے۔ ازبکستان روانگی سے قبل صحافیوں سے گفتگو کرتے ہوئے انہوں نے کہا کہ انہیں اتوار تک یروشلم میں امریکی سفارت خانے سے جواب ملنے کی توقع ہے۔

اسرائیلی آبادکاروں کے حملوں کی نگرانی کرنے والے اسرائیلی گروپ یش دین کے مطابق، 27 ستمبر سے اب تک مقبوضہ مغربی کنارے میں فلسطینیوں پر کم از کم 170 حملے کیے جا چکے ہیں۔ یہ عرصہ زیتون کی سالانہ فصل کی کٹائی کے آغاز کے قریب ہے۔