تیل اور ڈالر کی قیمتوں میں کمی کا اثر، عالمی منڈی میں سونا مہنگا

عالمی منڈی میں پیر کو سونے کی قیمتوں میں اضافہ ریکارڈ کیا گیا، جس کی بنیادی وجوہات میں امریکی ڈالر کی قدر میں کمی اور خام تیل کی قیمتوں میں کمی شامل ہیں۔ سرمایہ کار رواں ہفتے امریکا کے اہم افراط زر کے اعداد و شمار کے منتظر ہیں، جن سے امریکی مرکزی بینک کی آئندہ مالیاتی پالیسی کے بارے میں اشارے ملنے کی توقع ہے۔

اسپاٹ گولڈ کی قیمت 0.3 فیصد اضافے کے بعد 4,206.01 ڈالر فی اونس ہوگئی، جبکہ کاروبار کے دوران یہ 2 اکتوبر کے بعد بلند ترین سطح پر پہنچ گئی۔ امریکا میں دسمبر میں فراہمی کے لیے سونے کے مستقبل کے سودے بھی 0.3 فیصد بڑھ کر 4,230.40 ڈالر فی اونس ہوگئے۔

کے سی ایم ٹریڈ کے چیف مارکیٹ تجزیہ کار ٹم واٹرر کے مطابق، روس اور یوکرین کے درمیان توانائی کے شعبے میں جنگ بندی سے متعلق امریکی صدر ڈونلڈ ٹرمپ کے اعلان کے بعد خام تیل کی قیمتوں میں کمی اور ڈالر کی کمزوری نے سونے کو اضافے کا موقع فراہم کیا۔ ان کا کہنا تھا کہ تیل سستا ہونے سے افراط زر اور شرح سود سے متعلق فوری خدشات کم ہوئے ہیں۔

سرمایہ کار بدھ کو امریکی صارفین کے قیمتوں کے اشاریے (سی پی آئی) جبکہ جمعرات کو پیداواری قیمتوں کے اشاریے (پی پی آئی) اور خوردہ فروخت کے اعداد و شمار کا انتظار کررہے ہیں۔

دوسری جانب مشرق وسطیٰ کے تنازع کے باعث مہنگائی میں اضافے سے اکتوبر کے ابتدائی دنوں میں امریکی صارفین کا معاشی اعتماد مزید کم ہوگیا۔

دیگر قیمتی دھاتوں میں چاندی کی قیمت 0.5 فیصد بڑھ کر 61.12 ڈالر فی اونس ہوگئی، پلاٹینم ایک فیصد اضافے سے 1,704.70 ڈالر جبکہ پیلیڈیم 1.2 فیصد بڑھ کر 1,161.81 ڈالر فی اونس پر پہنچ گیا۔