یمن کی صدارتی کونسل کا حوثیوں سے تمام علاقے واپس لینے کے لیے فوجی آپریشن کا اعلان

یمن کی صدارتی کونسل کے سربراہ نے اتوار کو حوثی جنگجوؤں کے قبضے میں موجود تمام علاقوں کو واپس لینے کے لیے نئے فوجی آپریشن کے آغاز کا اعلان کردیا۔

رشاد العلیمی نے ایک بیان میں کہا میں آج جمہوریہ کے باقی ماندہ علاقوں کو واپس لینے اور پورے قومی علاقے میں ریاست اور اس کے اداروں کی عمل داری بحال کرنے کے لیے فوجی کارروائیوں کے آغاز کا اعلان کرتا ہوں۔

العلیمی نے مسلح افواج، سکیورٹی فورسز اور تمام فوجی دستوں سے اپیل کی کہ وہ منظور شدہ منصوبوں کے مطابق اپنی تفویض کردہ ذمہ داریوں پر عملدرآمد شروع کریں، یہاں تک کہ ملک کو حوثی دہشت گرد ملیشیا کے قبضے سے آزاد‘‘ کرالیا جائے۔

یہ اعلان حوثیوں کے خلاف جاری جنگ میں تازہ ترین بڑی کشیدگی کی نشاندہی کرتا ہے۔ گزشتہ ماہ حوثی گروپ کی جانب سے کی جانے والی تیز رفتار کارروائی کے نتیجے میں بحیرۂ احمر کے ساحلی علاقے کے وسیع حصے ان کے قبضے میں چلے گئے تھے۔

اتوار کے روز اس سے قبل سکیورٹی ذرائع نے خبر رساں ادارے اے ایف پی کو بتایا کہ مرکزی رسد کا راستہ منقطع کیے جانے کے بعد حوثیوں نے حکومت کے زیرِ قبضہ شہر تعز کا عملاً محاصرہ کرلیا ہے۔

یمن کی حکومتی فورسز حوثیوں کی حالیہ پیش قدمی کو روکنے میں ناکام رہی ہیں۔