پام آئل 13 ہفتوں کی کم ترین سطح پر، مسلسل دوسری ہفتہ وار کمی کا امکان
- پام آئل کا بینچ مارک کنٹریکٹ 26 رنگٹ کمی کے ساتھ 4,528 رنگٹ فی میٹرک ٹن پر آگیا
ملائیشین پام آئل فیوچرز کے نرخ مسلسل دوسرے ہفتے بھی کمی کی جانب گامزن رہے جبکہ قیمتیں مسلسل چھٹے سیشن میں بھی گر کر 13 ہفتوں کی کم ترین سطح پر پہنچ گئیں۔ اس کی وجوہات کمزور برآمدی اعدادوشمار اور پام آئل کے بلند ذخائر کی توقعات ہیں۔
برسا ملائیشیا ڈیریویٹوز ایکسچینج پر دسمبر میں ڈلیوری کے لیے پام آئل کا بینچ مارک کنٹریکٹ دوپہر کے وقفے تک 26 رنگٹ، یعنی 0.57 فیصد کمی کے ساتھ 4,528 رنگٹ فی میٹرک ٹن پر آگیا جبکہ دن کے آغاز میں یہ 3 جولائی کے بعد کی کم ترین سطح پر پہنچ گیا تھا۔
اس ہفتے اب تک اس کنٹریکٹ کی قیمت میں 3.08 فیصد کمی ہوچکی ہے۔
کوالالمپور میں مقیم ایک تاجر نے کہا کہ برسا ملائیشیا میں خام پام آئل کے فیوچرز کمزور برآمدات، پیداوار میں اضافے اور اختتامی ذخائر کے بڑھ کر 30 لاکھ ٹن سے تجاوز کرنے کے باعث دباؤ میں ہیں۔ انہوں نے مزید کہا کہ ستمبر میں پیداوار میں نمایاں اضافہ ہوا۔
کارگو سروے کرنے والی کمپنیوں انٹرٹیک ٹیسٹنگ سروسز اور ایم اسپیک ایگری ملائیشیا کے مطابق ستمبر میں ملائیشیا کی پام آئل مصنوعات کی برآمدات اگست کے مقابلے میں 17.1 فیصد سے 28.8 فیصد تک کم ہوئیں۔
شکاگو بورڈ آف ٹریڈ میں سویا آئل کی قیمتوں میں معمولی تبدیلی آئی اور ان میں 0.01 فیصد اضافہ ہوا۔
دالیان کموڈیٹی ایکسچینج عوامی تعطیل کے باعث بند رہا۔