پاکستان انٹرنیشنل آٹو شو 2026 کا آغاز، مریم نواز کی میڈ اِن پاکستان مصنوعات کی تعریف

وزیراعلیٰ پنجاب مریم نواز شریف نے لاہورایکسپو سینٹر میں پاکستان انٹرنیشنل آٹو شو 2026 کا افتتاح کردیا جس کے ساتھ تین روزہ نمائش کا باضابطہ آغاز ہوگیا۔

وزیراعلیٰ نے آٹو موبائل صنعت سے وابستہ صنعتکاروں سے غیر رسمی ملاقات کی اور ملکی اقتصادی ترقی کے لیے ان کی خدمات کو سراہا۔

مریم نواز شریف نے کہا کہ پاکستان کی آٹو موٹیو صنعت صنعتی ترقی، سرمایہ کاری اور روزگار کے مواقع پیدا کرنے کا اہم ذریعہ ہے۔ انہوں نے کہا کہ پنجاب حکومت مقامی پیداوار، سرمایہ کاری، ٹیکنالوجی اور جدت کے فروغ کے لیے پرعزم ہے۔

انہوں نے کہا کہ پاکستان انٹرنیشنل آٹو شو 2026 کاروباری روابط، سرمایہ کاری اور ٹیکنالوجی کی منتقلی کے فروغ میں مؤثر ثابت ہوگا۔

آٹو موبائل صنعت سے وابستہ ماہرین نے وزیراعلیٰ مریم نواز شریف کے وژن کو قابل تقلید قرار دیا۔ الیکٹرک وہیکل صنعت کے نمائندوں اور انتظامی افسران نے گرین ٹیکسی اور وزیراعلیٰ بائیک اسکیموں کو خراج تحسین پیش کیا۔

ای وی صنعت کے نمائندوں نے گرین ٹیکسی اور بائیک اسکیموں کو وزیراعلیٰ مریم نواز شریف کے بہترین اقدامات قرار دیا۔ ٹریکٹر ساز کمپنیوں کے نمائندوں اور مالکان نے گرین ٹریکٹر اسکیم کے اجرا کو سراہا۔

ٹریکٹر مینوفیکچررز کے نمائندوں نے کہا کہ گرین ٹریکٹر اسکیم نے ٹریکٹر مینوفیکچرنگ صنعت کو اپنے پاؤں پر کھڑا ہونے کے قابل بنایا ہے۔ انہوں نے کہا کہ وزیراعلیٰ مریم نواز شریف کی جانب سے متعارف کرائی گئی اس اسکیم سے مقامی ٹریکٹر مینوفیکچرنگ کو فروغ ملا ہے۔

پاکستان انٹرنیشنل آٹو شو کا افتتاح کرنے کے بعد وزیراعلیٰ مریم نواز شریف نے مختلف اسٹالز کا دورہ کیا۔ انہوں نے الیکٹرک گاڑیوں کا معائنہ کیا اور ایک الیکٹرک ایمبولینس میں خصوصی دلچسپی کا اظہار کیا۔

وزیراعلیٰ نے جدید ترین گاڑیوں، موٹر سائیکلوں اور جنریٹرز کا جائزہ لیا جبکہ سوزوکی کے بائیو گیس ماڈل کا بھی معائنہ کیا۔ انہوں نے ہونڈا، سوزوکی اور دیگر اسٹالز پر غیر ملکی ماہرین سے ملاقات کی اور نمائش میں پیش کی گئی مصنوعات کے بارے میں معلومات حاصل کیں۔

وزیراعلیٰ مریم نواز شریف نے میڈ اِن پاکستان مصنوعات کے معیار کو سراہا۔

پاپام کے چیئرمین عثمان اسلم ملک، چیف آرگنائزر سید نبیل ہاشمی اور دیگر نے وزیراعلیٰ کو تفصیلی بریفنگ دی۔

ایکسپو سینٹر کے چار ہالز میں جاری پاکستان انٹرنیشنل آٹو شو 2026 میں مقامی اور بین الاقوامی کمپنیوں نے بھرپور شرکت کی۔ آٹو شو میں مجموعی طور پر 150 نمائش کنندگان شریک ہوئے جن میں 44 بین الاقوامی اور 43 مقامی نمائش کنندگان شامل تھے۔

سوزوکی، کیا، جی اے سی، چیری، سازگار، بی وائی ڈی، جی ٹور، ہنڈائی اور ہونڈا سمیت معروف آٹو برانڈز نے نمائش میں اسٹالز قائم کیے۔