وزیراعظم کی سربراہی میں ٹریڈ فیسلیٹیشن بورڈ قائم

وزیراعظم شہباز شریف نے جمعرات کو ٹریڈ فیسلیٹیشن بورڈ کے قیام کی منظوری دے دی جس سے ظاہر ہوتا ہے کہ حکومت ٹریڈ فیسلیٹیش کو ادارہ جاتی سطح پر زیادہ ترجیح دے رہی ہے۔

یہ پیشرفت وزیراعظم شہباز شریف کی زیر صدارت تجارت میں سہولیات کی فراہمی کے حوالے سے اہم اجلاس کے دوران سامنے آئی۔

وزیراعظم محمد شہباز شریف خود ٹریڈ فیسلیٹیشن بورڈ کی صدارت کریں گے، مجوزہ بورڈ تجارت کے مکمل سپلائی چین میں بہتری لانے اور سرحد پار تجارت سے متعلق تمام نان ٹیرف امور پر فیصلے کرے گا۔ یہ بورڈ تجارت کے فروغ کے حوالےسے سے روڈ میپ ، ٹریڈ فسیلیٹیشن انڈیکس اور مانیٹرنگ کے حوالےسے حکمت عملی ترتیب دے گا۔

وزیراعظم نے ملک کی بندرگاہوں کی استعداد کار میں بہتری کے لئے ہنگامی بنیادوں پر کام کرنے اور مختلف ورکنگ گروپس بنانے کی بھی ہدایت کی۔ ورکنگ گروپس بندرگاہوں کی استعداد بہتر بنانے، متعلقہ محکموں کے درمیان ہم آہنگی کے فروغ ، ریگولیٹری فریم ورک کی تعمیل، پری ارآئیول کلیئرنس اور بین الاقوامی تجارت میں جھوٹے اور درمیانے درجے کے کاروباروں کی شمولیت سے متعلق ہوں گے۔

شہباز شریف نے درآمد کنندگان اور برآمد کنندگان کے لیے بندرگاہوں پر مال کی ترسیل، کلیئرنس اور دیگر امور کو آسان بنانے اور زیادہ سہولت فراہم کرنے کی بھی ہدایت کی۔

اجلاس کو بریفننگ میں بتایا گیا کہ جاری اصلاحات کے تحت پورٹ چارجز میں کمی کی گئی ہے جسکے بعد بندرگاہوں کے استعمال میں نمایاں بہتری آئی ہے۔ جہازوں کی آمد سے قبل گڈز ڈیکلریشن جمع کرانے کی سہولت میں مسلسل اضافہ ہو رہا ہے۔