امریکی ٹیرف کے جواب میں کینیڈا کا جوابی محصولات عائد کرنے کا اعلان

کینیڈا نے امریکی صدر ڈونلڈ ٹرمپ کی جانب سے کینیڈین مصنوعات پر 50 فیصد ٹیرف عائد کیے جانے کے جواب میں بعض امریکی اشیا پر جوابی ٹیرف عائد کرنے کا اعلان کردیا ہے۔ وزیراعظم مارک کارنی کے مطابق نئے اقدامات 8 ستمبر سے نافذ ہوں گے، جس سے دونوں دیرینہ اتحادیوں کے درمیان تجارتی کشیدگی مزید بڑھ گئی ہے۔

مارک کارنی نے ہفتہ کو پریس کانفرنس میں کہا کہ کینیڈا امریکا کے نئے ٹیرف کا ڈالر کے بدلے ڈالر کی بنیاد پر جواب دے گا تاکہ کینیڈین کارکنوں، کسانوں، خاندانوں اور کاروباروں کا تحفظ کیا جاسکے۔ انہوں نے کہا کہ کینیڈا امریکی اسٹیل، ڈیری مصنوعات، گھریلو آلات، زرعی مشینری، کاغذ و گودا اور الیکٹرانکس سمیت مختلف مصنوعات پر ٹیرف عائد کرے گا۔

یہ فیصلہ امریکا اور کینیڈا کے درمیان تین روزہ شدید تجارتی مذاکرات کے کسی معاہدے کے بغیر اختتام پذیر ہونے کے بعد سامنے آیا ہے۔ دونوں ممالک نے مذاکرات کی ناکامی کا ذمہ دار ایک دوسرے کو قرار دیا ہے، جس سے امریکا، میکسیکو اور کینیڈا کے آزاد تجارتی معاہدے کے مستقبل پر بھی سوالات اٹھ گئے ہیں۔

امریکا کے نئے ٹیرف میں کینیڈا کی شراب، فرنیچر، ڈیری مصنوعات، سیمنٹ، کپڑے، فشنگ راڈز اور ہاکی آلات سمیت مختلف شعبے شامل ہیں۔ ان محصولات کا دائرہ تقریباً 20 ارب ڈالر کی کینیڈین برآمدات تک ہے۔

مارک کارنی نے کہا کہ امریکا کی جانب سے مذاکرات کے آخری مرحلے میں ایسی شرائط پیش کی گئیں جو کینیڈا کے لیے غیر اقتصادی اور غیر منصفانہ تھیں اور کسی بھی ممکنہ معاہدے کے فوائد کو کمزور کرتی تھیں۔ ان میں کینیڈا کی نئے تجارتی معاہدے کرنے کی صلاحیت محدود کرنے کی تجاویز بھی شامل تھیں۔

امریکی تجارتی نمائندے جیمیسن گریر نے مذاکرات کی ناکامی کو کینیڈا کے لیے امریکا کے ساتھ شراکت داری کا ایک ضائع شدہ موقع قرار دیا اور کہا کہ واشنگٹن کینیڈا کے جوابی اقدامات کا جواب دینے کے لیے اقدامات کرے گا۔

مارک کارنی نے کہا کہ کینیڈا آئندہ ہفتے ان صنعتوں کے لیے معاون اقدامات کا اعلان کرے گا جو امریکی ٹیرف سے متاثر ہوں گی، جبکہ یہ امدادی اقدامات کئی سال تک جاری رہ سکتے ہیں۔ انہوں نے کہا کہ کینیڈا امریکا کے ساتھ اس تجارتی تنازع کے اثرات سے نمٹنے کے لیے اپنی صنعتوں کو تیار کر رہا ہے۔