وزیراعظم شہباز شریف نے گوگل پاکستان کے دفتر کا افتتاح کردیا

وزیراعظم شہباز شریف نے اسلام آباد میں گوگل پاکستان کے دفتر کا افتتاح کرتے ہوئے کہا کہ گوگل کے ساتھ شاندار شراکت داری اور مختلف شعبوں میں باہمی تعلقات کو مزید فروغ دینے کے وسیع امکانات موجود ہیں۔

وزیراعظم نے گوگل کے عالمی امور کے نائب صدر ولسن ایل وائٹ سے ملاقات کے دوران کہا کہ گوگل نہ صرف پاکستان بلکہ دنیا بھر میں ایک معروف نام ہے۔ اس موقع پر امریکی ناظم الامور نٹالی بیکر بھی موجود تھیں۔

وزیراعظم نے کہا کہ یہ ایک خوش آئند اتفاق ہے کہ گوگل ایسے وقت پاکستان آیا ہے جب ملک حکمرانی کے مختلف شعبوں میں بڑی ڈیجیٹل تبدیلی سے گزر رہا ہے۔ انہوں نے کہا کہ پاکستان میں نوجوانوں کی بڑی تعداد موجود ہے اور ہم ملک کی قسمت بدل سکتے ہیں۔

گوگل کے نائب صدر ولسن نے کہا کہ پاکستان میں دفتر کا افتتاح ٹیکنالوجی کمپنی کے لیے ایک اہم سنگ میل ہے۔ انہوں نے کہا کہ گوگل گزشتہ ایک دہائی سے پاکستان میں سرمایہ کاری اور یہاں اپنے عزم کو آگے بڑھا رہا ہے، جبکہ مقامی دفتر کا قیام ایک خاص موقع ہے۔

انہوں نے کہا کہ وزیراعظم کا پاکستان کو 30 ارب ڈالر کی آئی ٹی برآمدی مرکز بنانے کا ہدف گوگل کے مقاصد سے مکمل طور پر ہم آہنگ ہے۔

ولسن کے مطابق گزشتہ 10 برس کے دوران گوگل نے پاکستان کے مقامی کاروباری اداروں اور گھرانوں کے لیے 3.9 کھرب روپے سے زائد کی معاشی سرگرمی میں حصہ ڈالا، جس سے 9 لاکھ 60 ہزار سے زائد ملازمتیں پیدا ہوئیں اور یہ صرف آغاز ہے۔

انہوں نے کہا کہ گوگل پاکستان کے 30 ارب ڈالر کی آئی ٹی برآمدات کے ہدف کو تین بڑے طریقوں سے آگے بڑھانے کے لیے پرعزم ہے، جن میں پاکستانی افرادی قوت، ہارڈویئر کی تیاری اور برآمدی انفرااسٹرکچر، جبکہ تیسرا مقامی کاروباری اداروں میں سرمایہ کاری شامل ہے۔

پاکستانی افرادی قوت میں سرمایہ کاری کے حوالے سے ولسن نے کہا کہ پاکستان میں جاری ڈیجیٹل تبدیلی اس وقت تک ممکن نہیں جب تک مقامی افراد پر سرمایہ کاری نہ کی جائے۔ گوگل اب تک 10 لاکھ سے زائد پاکستانیوں کو ڈیجیٹل مہارتوں کی تربیت دے چکا ہے۔

انہوں نے مزید اعلان کیا کہ پاکستانی طلبہ کے لیے گوگل جیمنائی ایک سال تک مفت فراہم کیا جائے گا۔

نومبر 2025 میں وفاقی وزیر برائے آئی ٹی و ٹیلی کمیونیکیشن شزا فاطمہ خواجہ نے اعلان کیا تھا کہ عالمی ٹیکنالوجی کمپنی گوگل نے پاکستان میں اپنی رجسٹریشن مکمل کرلی ہے اور جلد مقامی دفتر قائم کرے گی، جبکہ ہری پور میں گوگل کروم بکس کی تیاری بھی شروع ہوچکی ہے۔