سندھ میں مون سون سسٹم شدت اختیار کرگیا، کراچی میں مزید بارش کا امکان

محکمہ موسمیات کی پیشگوئی کے مطابق 27 جولائی تک سندھ کے مختلف علاقوں میں آندھی اور گرج چمک کے ساتھ بارش کا امکان ہے۔ محکمہ موسمیات نے خبردار کیا ہے کہ تیز بارش کے باعث نشیبی علاقوں میں اربن فلڈنگ کا خدشہ ہے۔

محکمۂ موسمیات کے مطابق جنوب مغربی راجستھان اور اس سے ملحقہ علاقوں پر کم دباؤ کا سسٹم تاحال برقرار ہے جبکہ بحیرہ عرب سے مون سون کی طاقتور ہوائیں پاکستان کے جنوبی اور وسطی حصوں میں داخل ہورہی ہیں۔

کراچی میں آئندہ چند روز کے دوران زیادہ تر موسم ابر آلود اور گرم رہنے کا امکان ہے جب کہ ہوا میں نمی کی مقدار بھی زیادہ رہے گی۔ شہر میں ہلکی بارش یا بوندا باندی ہوسکتی ہے جبکہ مضافاتی علاقوں میں گرج چمک کے ساتھ بارش کا امکان ظاہر کیا گیا ہے۔

پی ایم ڈی نے پیش گوئی کی ہے کہ 27 جولائی تک تھرپارکر، عمرکوٹ، میرپورخاص، بدین، سانگھڑ، ٹنڈو محمد خان، ٹنڈو اللہ یار، حیدرآباد، مٹیاری، جامشورو اور شہید بینظیرآباد کے اضلاع میں وقفے وقفے سے گرج چمک کے ساتھ درمیانی سے بعض مقامات پر تیز بارش کا امکان ہے۔

اسی عرصے کے دوران گھوٹکی، کشمور، جیکب آباد، شکارپور، سکھر، قمبر شہدادکوٹ، لاڑکانہ، خیرپور، نوشہرو فیروز اور ٹھٹھہ کے اضلاع میں بھی ہلکی سے درمیانی بارش، گرد آلود ہواؤں اور گرج چمک کے ساتھ بارش کا امکان ہے۔

محکمہ موسمیات نے خبردار کیا ہے کہ تیز ہوائیں اور آسمانی بجلی انفرااسٹرکچر کو نقصان پہنچا سکتی ہیں جن میں سولر پینلز، بجلی کے کھمبے اور اشتہاری بورڈز شامل ہیں۔

محکمہ موسمیات نے یہ بھی متنبہ کیا ہے کہ شدید بارش کے باعث تھرپارکر، عمرکوٹ، میرپورخاص، بدین، سانگھڑ، ٹنڈو محمد خان، ٹنڈو اللہ یار، حیدرآباد، مٹیاری اور شہید بینظیرآباد میں اربن فلڈنگ کا خدشہ ہے۔

پی ایم ڈی نے کسانوں کو مشورہ دیا کہ وہ موسمی پیش گوئی کے مطابق زرعی سرگرمیوں کی منصوبہ بندی کریں اور مویشیوں کے تحفظ کیلئے ضروری اقدامات کریں۔