سرحد پار دہشت گردی کو ریاست کی پوری قوت سے کچل دیا جائے گا، فیلڈ مارشل عاصم منیر

چیف آف ڈیفنس فورسز اور چیف آف آرمی اسٹاف فیلڈ مارشل عاصم منیر نے بدھ کو عزم ظاہر کیا کہ پاکستان کی سرحدوں کے پار سے ہونے والی دہشت گردی کو ”ریاست کی پوری قوت“ سے کچل دیا جائے گا، اور دشمن خفیہ ایجنسیوں کی سرپرستی میں کام کرنے والے پراکسی نیٹ ورکس کو ملک کو غیر مستحکم کرنے کی اجازت نہیں دی جائے گی۔

پاک فوج کے شعبۂ تعلقاتِ عامہ (آئی ایس پی آر) کے جاری کردہ بیان کے مطابق فیلڈ مارشل نے کہا کہ مسلح افواج ان ریاستی سرپرستی میں جاری کوششوں سے پوری طرح آگاہ ہیں، جن کے ذریعے دشمن خفیہ ایجنسیاں پاکستان کے داخلی امن اور معاشی استحکام کو نقصان پہنچانے کی کوشش کر رہی ہیں۔

انہوں نے کہا، ”دشمن خفیہ ایجنسیوں کی سرپرستی میں کام کرنے والے ایسے پراکسی نیٹ ورکس اور عناصر کی تمام کوششیں بے سود ہیں اور انہیں پاکستان کے داخلی امن اور معاشی خوشحالی کو نقصان پہنچانے کی ہرگز اجازت نہیں دی جائے گی۔“

فیلڈ مارشل کا یہ بیان ایسے وقت میں سامنے آیا جب چند گھنٹے قبل آئی ایس پی آر کے ڈائریکٹر جنرل لیفٹیننٹ جنرل احمد شریف چوہدری نے بتایا تھا کہ 5 جولائی سے بلوچستان میں دہشت گرد حملوں اور بعد ازاں سیکیورٹی فورسز کی کارروائیوں کے دوران 42 شہری اور سیکیورٹی اہلکار شہید ہوئے، جن میں 4 شہری، 27 پولیس اہلکار اور 11 فوجی شامل ہیں، جبکہ 54 دہشت گرد مارے گئے۔

فیلڈ مارشل عاصم منیر نے یہ باتیں اسلام آباد میں نیشنل ڈیفنس یونیورسٹی (این ڈی یو) میں نیشنل سیکیورٹی اینڈ وار کورس کے فارغ التحصیل افسران سے خطاب کرتے ہوئے کہیں۔

انہوں نے جدید جنگ کی بدلتی ہوئی نوعیت پر روشنی ڈالتے ہوئے کہا کہ ہائبرڈ، روایتی اور غیر روایتی خطرات سے نمٹنے کے لیے واضح حکمت عملی، ادارہ جاتی پیشہ ورانہ صلاحیت اور مکمل تیاری ناگزیر ہے۔

انہوں نے کہا کہ این ڈی یو جیسے ادارے مستقبل کے عسکری اور سول قائدین کو پیچیدہ سیکیورٹی چیلنجز سے مؤثر انداز میں نمٹنے کے لیے تیار کرنے میں کلیدی کردار ادا کرتے ہیں۔

فیلڈ مارشل نے کہا کہ پاکستان کی مسلح افواج بدلتے ہوئے جنگی تقاضوں سے ہم آہنگ رہنے کے لیے اپنی عملی حکمت عملی اور ترقیاتی منصوبوں کو مسلسل جدید بنا رہی ہیں۔

انہوں نے کہا، ”جنگیں میڈیا کی بیان بازی یا سیاسی نعروں سے نہیں بلکہ ایمان، اتحاد اور نظم و ضبط سے جیتی جاتی ہیں۔“

انہوں نے مسلح افواج کی پیشہ ورانہ صلاحیت، بلند حوصلے اور عملی تیاری پر مکمل اعتماد کا اظہار کرتے ہوئے فارغ التحصیل افسران پر زور دیا کہ وہ دیانت داری، بے لوث خدمت اور وطن سے غیر متزلزل وابستگی کی اقدار کو ہمیشہ مقدم رکھیں۔

آئی ایس پی آر کے مطابق فیلڈ مارشل عاصم منیر کی آمد پر نیشنل ڈیفنس یونیورسٹی کے صدر نے ان کا استقبال کیا۔