وفاقی وزیر داخلہ محسن نقوی ریاض پہنچ گئے

وفاقی وزیرِ داخلہ و انسدادِ منشیات محسن رضا نقوی منگل کو سرکاری دورے پر ریاض پہنچ گئے۔ یہ بات سعودی وزارتِ داخلہ نے بتائی ہے۔

شاہ خالد بین الاقوامی ہوائی اڈے پر سعودی وزیرِ داخلہ شہزادہ عبدالعزیز بن سعود بن نایف نے ان کا استقبال کیا۔ اس موقع پر ریاض ریجن کے نائب گورنر شہزادہ محمد بن عبدالرحمن بن عبدالعزیز، پاکستان میں سعودی عرب کے سفیر نواف بن سعید المالکی اور دیگر اعلیٰ حکام بھی موجود تھے۔

سعودی پریس ایجنسی (ایس پی اے) کے مطابق پاکستانی وزیرِ داخلہ سرکاری دورے پر مملکتِ سعودی عرب پہنچے ہیں۔

توقع ہے کہ اس دورے میں پاکستان اور سعودی عرب کے درمیان داخلی سلامتی، انسدادِ منشیات اور باہمی دلچسپی کے دیگر شعبوں میں دوطرفہ تعاون کو مزید فروغ دینے پر بات چیت کی جائے گی۔