آبنائے ہرمز میں کشیدگی، پاکستان کا روس سے مزید تیل منگوانے کا منصوبہ

روس کی سرکاری خبر رساں ایجنسی تاس نے روس میں متعین پاکستانی سفیر فیصل نیاز ترمذی کے حوالے سے رپورٹ کیا ہے کہ آبنائے ہرمز کے بحران کے تناظر میں پاکستان نے روس سے تیل کی درآمدات میں اضافے کا منصوبہ بنایا ہے۔

سفیر نے یہ بھی بتایا کہ پاکستان اور روس پاکستان اسٹریم گیس پائپ لائن کے منصوبے پر کام کر رہے ہیں۔

تاس نیوز ایجنسی کے مطابق سفیر فیصل نیاز ترمذی نے کہا کہ نارتھ- ساؤتھ گیس پائپ لائن ایک نہایت اہم منصوبہ ہے اور پاکستان یقیناً کسی نہ کسی مرحلے پر اس کی جانب دوبارہ پیشرفت کرے گا۔

انہوں نے کہا کہ جیسے ہی اقتصادی تعاون کے طریقۂ کار میں نئی رفتار آئے گی، نارتھ-ساؤتھ گیس پائپ لائن یا پاکستان اسٹریم منصوبہ پاکستان اور روس کے درمیان ایک سنگِ میل معاہدہ ثابت ہوگا جس پر اس وقت کام جاری ہے۔

انہوں نے مزید بتایا کہ اس حوالے سے روسی حکام کے ساتھ مذاکرات کا سلسلہ بھی جاری ہے۔

انہوں نے واضح کیا کہ پاکستان روسی فریق کے ساتھ مسلسل رابطے میں ہے اور اسے روس سے تیل اور گیس کی فراہمی کی توقع ہے۔