پرانے موبائل فونز کی درآمد مہنگی، 62 ماڈلز کی کسٹمز ویلیو میں اضافہ

ڈائریکٹوریٹ جنرل کسٹمز ویلیوایشن کراچی نے چار معروف برانڈز کے 62 ماڈلز پر مشتمل استعمال شدہ موبائل فونز کی درآمد پر کسٹمز ویلیو میں اضافہ کر دیا ہے۔ یہ موبائل فونز تجارتی مقدار میں بغیر پیکنگ اور لوازمات کے درآمد کیے جاتے ہیں۔

نئی ویلیوایشن کے مطابق ایپل، شارپ، سام سنگ، گوگل پکسل اور ون پلس سمیت مختلف ماڈلز پر بڑھائی گئی کسٹمز ویلیو لاگو ہوگی۔ اس حوالے سے ویلیوایشن رولنگ نمبر 2035/2026 کو منسوخ کرتے ہوئے نئی رولنگ نمبر 2070/2026 جاری کر دی گئی ہے۔

نئی ہدایات کے مطابق یہ کسٹمز ویلیوز استعمال شدہ موبائل فونز کی کسی بھی گریڈ یا حالت سے قطع نظر لاگو ہوں گی۔ شرط یہ بھی رکھی گئی ہے کہ استعمال شدہ موبائل فونز پاکستان درآمد سے کم از کم چھ ماہ قبل ایکٹیویٹ شدہ ہوں۔ درآمد کنندہ کو ایکٹیویشن مدت ظاہر کرنا ہوگی جس کی تصدیق متعلقہ کلیکٹریٹ کے افسران کریں گے۔

ایسے برانڈز اور ماڈلز جو تجارتی مقدار میں درآمد ہوں مگر نئی فہرست میں شامل نہ ہوں، ان کی ویلیوایشن کسٹمز ایکٹ 1969 کی دفعہ 25(5) اور 25(6) کے تحت کی جائے گی۔

قبل ازیں ویلیوایشن رولنگ نمبر 2035/2026 کو مختلف فریقین نے چیلنج کیا تھا، جس پر ڈائریکٹر جنرل نے فیصلہ دیتے ہوئے متعلقہ ادارے کو دوبارہ سماعت اور شواہد کی جانچ کے بعد نئی رولنگ جاری کرنے کی ہدایت کی تھی۔ اجلاس میں اسٹیک ہولڈرز نے شرکت کی تاہم مطلوبہ دستاویزی شواہد مکمل طور پر فراہم نہیں کیے گئے۔

کاپی رائٹ بزنس ریکارڈر، 2026