آل راؤنڈر کرن نے آخری اوورز میں لڑکھڑاتی ہوئی انگلینڈ کی ٹیم میں جان ڈال دی

انگلینڈ کی ٹیم سپر ایٹ مرحلے میں میزبان سری لنکا کا سامنا کرے گی لیکن سیم کرن کی شاندار کارکردگی کے بغیر ہیری بروک کی قیادت میں یہ ٹیم شاید اب تک وطن واپسی کی پرواز پکڑ چکی ہوتی۔ اس آل راؤنڈر نے مشکل وقت میں خود کو بحران کا مرد میدان ثابت کیا اور نیپال، اٹلی جیسی ایسوسی ایٹ ٹیموں کے خلاف آخری اوورز (ڈیتھ اوورز) میں فتح گر باؤلنگ کے ذریعے انگلینڈ کو شرمناک شکستوں سے بچایا۔

ممبئی کے کھچا کھچ بھرے وانکھیڑے اسٹیڈیم میں 16 ویں نمبر کی نیپال کو تاریخ کا سب سے بڑا اپ سیٹ کرنے کے لیے آخری اوور میں صرف 10 رنز درکار تھے۔ انتہائی دباؤ اور نیپال کے حامی تماشائیوں کے شور میں بائیں ہاتھ کے فاسٹ باؤلر سیم کرن نے صرف 5 رنز دے کر میچ جتوا دیا۔ کپتان ہیری بروک نے کرن کو آخری اوورز کا قابلِ اعتماد اور پُرسکون کھلاڑی قرار دیا۔

اسی طرح اٹلی کے خلاف کولکتہ میں جب میچ انگلینڈ کے ہاتھ سے نکلتا دکھائی دے رہا تھا، کرن نے 19 ویں اوور میں صرف 5 رنز دے کر حریف ٹیم کی امیدوں پر پانی پھیر دیا۔ سیم کرن، جو ایک سال قبل ٹیم سے باہر تھے، اب کوچ برینڈن میکولم اور کپتان بروک کے سب سے معتبر کھلاڑی بن چکے ہیں۔ وہ نہ صرف باؤلنگ بلکہ بیٹنگ میں بھی نمبر 6 پر اہم رنز بنا کر انگلینڈ کی امیدوں کو زندہ رکھے ہوئے ہیں۔